30 تامىز كۇنى قىرعىز مەملەكەتتىك تەحنيكالىق ۋنيۆەرسيتەتى جانىنان قىرعىز-قىتاي وزىق ينجەنەرلەر ينستيتۋتى اشىلدى. جاڭا وقۋ ورنىن جابدىقتاۋعا قىتاي تاراپى شامامەن 200 ملن سوم بولگەن، دەپ حابارلايدى "ادىرنا".
ينستيتۋتتا ەنەرگەتيكا، تاۋ-كەن ونەركاسىبى جانە باسقا دا سالالارعا مامان دايارلايتىن 15 زاماناۋي زەرتحانا جۇمىس ىستەيدى. جوبا ۋنيۆەرسيتەت، عىلىم جانە ءوندىرىس اراسىنداعى بايلانىستى كۇشەيتىپ، ستۋدەنتتەرگە تەوريامەن قاتار پراكتيكالىق تاجىريبە الۋعا مۇمكىندىك بەرەدى.
العاشقى ماگيسترلىك باعدارلامالار جاسىل ەنەرگەتيكا، تاۋ گەولوگياسى جانە تاۋ-كەن ونەركاسىبى باعىتتارى بويىنشا ىسكە قوسىلدى. ساباقتار اعىلشىن تىلىندە وتەدى. ستۋدەنتتەر ءبىرىنشى جىلى قىرعىزستاندا ءبىلىم الىپ، كەيىن ءبىر سەمەستر قىتايداعى سەرىكتەس ۋنيۆەرسيتەتتە وقيدى. ودان سوڭ كاسىپورىندا وندىرىستىك تاجىريبەدەن وتەدى.
ينستيتۋتتاعى زەرتحانالار جەتى كومپانيانىڭ قاتىسۋىمەن جابدىقتالعان. كاسىپورىندار وقۋ پروتسەسىنە قاتىسىپ، ستۋدەنتتەردىڭ وندىرىستىك تاجىريبەسىن ۇيىمداستىرۋعا جانە عىلىمي زەرتتەۋلەر جۇرگىزۋگە اتسالىسادى.
قىرعىزستاننىڭ عىلىم، جوعارى ءبىلىم جانە يننوۆاتسيالار ءمينيسترى گۇلزات يساماتوۆانىڭ ايتۋىنشا، ينستيتۋت قىرعىزستان مەن قىتاي اراسىنداعى عىلىمي-تەحنيكالىق ىنتىماقتاستىقتىڭ ماڭىزدى جوبالارىنىڭ ءبىرى. مۇنداعى زەرتحانالار ستۋدەنتتەردەن بولەك، جاس عالىمدار مەن زەرتتەۋشىلەرگە دە قولجەتىمدى بولادى.
الداعى ۋاقىتتا قىرعىز مەملەكەتتىك تەحنيكالىق ۋنيۆەرسيتەتى توننەل قۇرىلىسى، كوپىر قۇرىلىسى جانە حيميالىق تەحنولوگيا باعىتتارى بويىنشا جاڭا ماگيسترلىك باعدارلامالاردى اشۋدى جوسپارلاپ وتىر.
