Mundaı baılar memleketke óte qaýipti - qoǵam belsendisi Qordaıdaǵy kóp bylyqtyń betin ashty

2982
Adyrna.kz Telegram
Qoǵam belsendisi, Áýlıeata óńiriniń týmasy Jasulan Ábdihalyq Qordaıdaǵy keleńsizdikterdi jarııalap, shekaradaǵy shıelenisken máseleni alǵa tartty, dep habarlaıdy "Adyrna" ulttyq portaly. Onyń aıtýynsha, Shyntasov esimdi kásipker shekara túbinde óz kásibin dóńgeletip, zańdy belshesinen basqan. Dáýleti asqan azamattyń shekara túsinde salǵan ǵımaraty el aralyq qatynasta yńǵaısyzdyq týdyryp otyr. 
"Myna tómendegi vıdeodaǵy ǵımarat keshe men jazǵan Shyntasov degen dáýdiki. Álgi, halyqtyń jerin tartyp alyp paıyn bermeı zań eńiretip júrgen qarabaı! Eshkimnen ruqsat almastan dál keden beketi ornalasqan shekaranyń túbine qonaq úı, kafesimen salyp tastaǵan. Salynǵan ǵımarattyń syrtyn aınala qorshap tastaǵan. Onsyz da at aınalyp júre almaıtyn jerde uzyn-sonar kezek! Keptelip qalǵan kólikter! Al, Shyntasovqa báribir. Prokýroryńa da, sotyńa da pysqyryp qaramaǵan. Al endi bul jer sottyń sheshimimen buzylǵaly jatyr. Kinásyn moıyndap, alystaý jerden ǵımarat soǵaıyn degen kásipker joq!" - dep jazdy týǵan óńiriniń janashyry.
Avtor keıinnen shekara túbinde bolyp jatqan shıelenisti sýrettep, shıryqqan Shyntasovtyń áreketin synǵa aldy.
- Shyntasov qaıta kúshenip, bılikke ýltımatým qoıyp otyr. Eger de deıdi, ǵımaratymdy snosqa jiberseńder, halyqty jıyp mıtıngige shyǵamyn, Toqaevqa qarsylyǵymdy bildiremin, býnt kóteremin. Buǵan kim ilesedi, zańsyz soǵylǵan ǵımaratty qıratty dep kim kóshege shyǵady deseńder, qatty qatelesemiz. Búkil Qordaıdyń bıznes nysandary Shyntasovtardyń qolynda. Tómendegi sýrettegi bazar, dúkender, dárihanalar, býtıkter, kafeler, zapravkalar! Bulardyń barlyǵynda arenda tólep adamdar nápaqasyn taýyp, kúnin kórip otyr. Kóshege shyqsańdar arendanyń baǵasyn túsiremin, shyqpasańdar kóteremin dese jetip jatyr. Kredıtte otyrǵan baıqus saýdagerler ylajsyz kóshege shyǵady, - dep jazdy ol.
Jasulan Ábdihalyqtyń kózqarasynda Qordaı aımaǵy shyrpy tıse, shyrt janatyn aýdan. Shyntasov isi shiderlenbese, sońy ultarazdyq qaqtyǵystarǵa ulasýy bek múmkin. Jazba avtory óz oıyn kelesideı jalǵady:
"Sondyqtan Shyntasovtardan qorqý kerek! Mundaı baılar memleketke óte qaýipti! Ulttyq qaýipsizdik qyzmeti qazirden aldyn-almasa, shekaranyń túbinen mundaı býnt shyqsa, arǵy jaǵy ultarazdyq daýǵa ulasyp shıelenisip ketedi. Qordaı degen shyrpy tıse shyrt etkeli turǵan shekaradaǵy qıyn aımaq. Sondyqtan Úısimbaev sııaqty ıdeologsymaqtar kóleńkeli kabınette otyra bermeı baryńdar, sóılesińder, retteńder! Ánsheıinde FB-da jazǵandy sotqa súırep júrsińder. Al mıtıng jasaımyn dep iritki salyp otyrǵan Shyntasovqa shamalaryń jeter me eken kóreıin. Erteń kesh bolady!" - dedi J. Ábdihalyq.
Dáýleti tasqan azamat Shyntasovtyń bul áreketin jelide jaqsyǵa balap jatqandar joq. Jeli qoldanýshylary bul haqynda:
"Strategııalyq mańyzy bar obektini bazar qyp jibergen kók qaǵazdyń kúshi ǵoı", "Osyndaılarǵa rızamyn,  qalaı kózderi baqyraıyp, eldi ábigerge salyp qoıyp, ózderiniń tirshiligin jasaı beredi eken. Ne degen qudiret?", "Pah shirkin, ne degen baılyq, ne degen toıymsyzdyq",  "Jalpy halyqtyń kókeıine qonbaıtyn máseleler qordalandy. Búgingi tańda solardyń biri jer máselesi. Al jer jer daýyna kelgende halyqtyń tózimdiligin synaýǵa bolmaıdy. Halyqtyń júıkesin tozdyrmaý kerek. Halyq dál jer sekildi qozǵalmaıdy, qozǵalsa qatty qozǵalady. Sondyqtan Shyntasov myrzaǵa aıtarym "Daraq bir jerde turyp kógeredi". El arasyna iritki salmaı,  mámilege kelgeni jón", "Halyqtyń jeri óz menshigine qaıtarylý kerek, ákimniń ádilet jolyndaǵy kúresinde qoldaý kórestemiz! Ádildik ornasyn!", "Mundaı jaǵdaı barlyq jerde bar. Ákimdik emes, ár óńirdiń baı-baǵlandary bılep tóstep otyr" dep jazdy azamattar.
"Adyrna" ulttyq portaly
Pikirler