Saıası naýqanda baq synap, el basshysy atanýǵa talpynatyn Jıgýlı Daırabaevtyń ataǵy jer jaryp tur. Bul jaıly úmitker shtabynyń jetekshisi Tóleýtaı Rahymbekov aıtty. Ol úgit-nasıhat jumystarynyń qarqyny jaıly otandyq telearnalardyń birine suhbat berdi, dep habarlaıdy "Adyrna" ulttyq portaly.
Jıgýlı Daırabaevqa qarasty respýblıkalyq-qoǵamdyq shtab jetekshisi Tóleýtaı Rahymbekovtiń sózine sensek, úgit-nasıhat jumysy qyzý júrip jatyr. Kandıdattyń tikeleı qatysýymen alty óńirde kezdesý ótse, kandıdattyń senimdi ókilderiniń qatysýymen mundaı jumys Qazaqstannyń búkil eldi-mekenin qamtyǵan.
Tóleýtaı Rahymbekov "Aýyl" partııasynyń saılaýǵa daıyndyqty aldyńǵy saılaý óte salysymen, ıaǵnı 2019 jylǵy 19 maýsymda bastap ketkenin de atap ótti.
"Aýyl partııasy" aýyldar men aýyl sharýashylyǵynyń ǵana máselesin sheshpeıdi, basqa da azamattardyń, qala turǵyndarynyń da máselesine nazar aýdarady. Qala halqynyń da, aýyl halqynyń da kóterip otyrǵan máselelerine qarap, durys jolmen kele jatyrmyz dep esepteımiz, - dedi Tóleýtaı Rahymbekov.
Ol sondaı-aq "Aýyl" partııasynyń atynan perzıdenttikke kandıdat usynylar kezde tereń talqylaý, uzaq pikirtalas bolǵanyn jetkizdi. Aqyrynda ómirlik tájirbıesi mol, kez kelgen máseleni sheshý joldaryn jaqsy biletin Jıgýlı Daırabaevtyń usynylǵanyn aıtty. Onyń aıtýynsha, Jıgýlı Daırabaev saıasattaǵy kóldeneń kók atty emes, ıaǵnı jańa kelgen adam emes, saıasatta otyz jyldan beri júrgen adam.
Oraıy kelgende aıta keteıik, Jıgýlı Moldaqalyquly «Aýyldan shyqtyq» uranymen saıasat maıdanda kúreske túsip jatyr.
"Adyrna" ulttyq portaly
