ۇلىتاۋ وبلىسىنداعى «جومارت» كەنىشىندە بولعان قايعىلى وقيعادا قازا تاپقان ولجاس نۇرىلداەۆتىڭ ارتىندا بەس بالاسى قالدى، دەپ حابارلايدى "ادىرنا" ۇلتتىق پورتالى Ulysmedia.kz-كە سىلتەپ.
مارقۇمنىڭ تۋىسى سەرىك دۇيسەنۇلىنىڭ ايتۋىنشا، ولجاس ءتورت ۇل، ءبىر قىزدىڭ اكەسى بولعان.
«جارى بار، اناسى بار، ءىنىسى مەن قارىنداسى بار. ءىنىمىزدىڭ قازاسى – ءبىز ءۇشىن ورنى تولماس قايعى. ول ۇلكەن اكەسىنەن ءتالىم-تاربيە العان، ءجون-جوبانى بىلەتىن ازامات ەدى. بالالارىنىڭ ۇلكەنى 24 جاستا، كەنجەسى ەكىدە. ۇكىمەت بەرگەن ۋادەسىندە تۇرىپ، بالالارىنا قامقورلىق جاساسا دەيمىز»، – دەيدى سەرىك دۇيسەنۇلى.
ايتا كەتەيىك، 17 اقپان كۇنى كەشكە ۇلىتاۋ وبلىسىنىڭ جاڭاارقا اۋدانىنداعى «قازاقمىس» كورپوراتسياسىنا قاراستى «جومارت» كەنىشىندە تاۋ-كەن ماسساسى وپىرىلىپ تۇسكەن. قۇتقارۋشىلار ىزدەستىرۋ جۇمىستارى بارىسىندا ءۇيىندى استىندا قالعان جەتى كەنشىنىڭ دەنەسىن تاپتى.
وقيعادان كەيىن ۇلىتاۋ وبلىسىندا اپاتتان قازا تاپقان كەنشىلەردىڭ سۋرەتتەرى جاريالاندى.
ۇقساس جاڭالىقتار
