قاسىم-جومارت توقاەۆ تۇركيانىڭ رەسپۋبليكا كۇنىنە وراي وسى ەلدىڭ پرەزيدەنتى رەجەپ تايپ ەردوعانعا جانە بارشا تۇرىك حالقىنا جۇرەكجاردى قۇتتىقتاۋىن جولدادى. بۇل تۋرالى اقوردا جازدى، دەپ حابارلايدى «ادىرنا» ءتىلشىسى.
– ۇلت بىرلىگى مەن ىنتىماعىنىڭ ايقىن كورىنىسى، ەركىندىك پەن جاسامپازدىقتىڭ بىرەگەي نىشانى بولعان بۇل كۇننىڭ ەل تاريحىندا ورنى ەرەكشە ەكەنى ءسوزسىز. وسى قۇندىلىقتاردى تۋ ەتكەن انادولى ەلى – قازىرگى تاڭدا جاھاندىق دەڭگەيدەگى جەتىستىكتەرىن بۇكىل دۇنيەجۇزى مويىنداعان بەلدى دە بەدەلدى مەملەكەت. مۇنىڭ ءبارى ەل باسقارۋ ىسىندەگى مول تاجىريبەڭىز بەن دانا ساياساتىڭىزدىڭ، قاجىرلى ەڭبەگىڭىز بەن ەرەكشە تۇلعالىق قاسيەتتەرىڭىزدىڭ ارقاسى دەپ بىلەمىن. وسى تۇستا ءسىزدىڭ پاراساتتى باسشىلىعىڭىزبەن وتانىڭىزدىڭ الەمدەگى مارتەبەسى ودان ءارى اسقاقتاپ، حالقىڭىزدىڭ ىرىس-بەرەكەسى ەسەلەي بەرۋىنە تىلەكتەستىگىمدى بىلدىرەمىن، – دەپ جازىلعان قازاقستان پرەزيدەنتىنىڭ جەدەلحاتىندا.
قاسىم-جومارت توقاەۆ 30 جىل بۇرىن قازاقستان مەن تۇركيا اراسىندا ديپلوماتيالىق قاتىناستار ورناعانىن، بۇگىندە ىنتىماقتاستىعىمىز كەڭەيتىلگەن ستراتەگيالىق سەرىكتەستىك رۋحىندا قارقىندى دامىپ كەلە جاتقانىن اتاپ ءوتتى.
سونداي-اق مەملەكەت باسشىسى تۇركيا پرەزيدەنتىنىڭ اسا جاۋاپتى قىزمەتىنە تولايىم تابىس، وتباسىنا باياندى باقىت، ال اعايىن تۇرىك حالقىنا مول ىرىس پەن قۇت-بەرەكە تىلەيتىنىن جەتكىزدى.
