Qasym-Jomart Toqaev Túrkııanyń Respýblıka kúnine oraı osy eldiń Prezıdenti Rejep Taııp Erdoǵanǵa jáne barsha túrik halqyna júrekjardy quttyqtaýyn joldady. Bul týraly Aqorda jazdy, dep habarlaıdy «Adyrna» tilshisi.
– Ult birligi men yntymaǵynyń aıqyn kórinisi, erkindik pen jasampazdyqtyń biregeı nyshany bolǵan bul kúnniń el tarıhynda orny erekshe ekeni sózsiz. Osy qundylyqtardy tý etken Anadoly eli – qazirgi tańda jahandyq deńgeıdegi jetistikterin búkil dúnıejúzi moıyndaǵan beldi de bedeldi memleket. Munyń bári el basqarý isindegi mol tájirıbeńiz ben dana saıasatyńyzdyń, qajyrly eńbegińiz ben erekshe tulǵalyq qasıetterińizdiń arqasy dep bilemin. Osy tusta Sizdiń parasatty basshylyǵyńyzben Otanyńyzdyń álemdegi mártebesi odan ári asqaqtap, halqyńyzdyń yrys-berekesi eseleı berýine tilektestigimdi bildiremin, – dep jazylǵan Qazaqstan Prezıdentiniń jedelhatynda.
Qasym-Jomart Toqaev 30 jyl buryn Qazaqstan men Túrkııa arasynda dıplomatııalyq qatynastar ornaǵanyn, búginde yntymaqtastyǵymyz keńeıtilgen strategııalyq seriktestik rýhynda qarqyndy damyp kele jatqanyn atap ótti.
Sondaı-aq Memleket basshysy Túrkııa Prezıdentiniń asa jaýapty qyzmetine tolaıym tabys, otbasyna baıandy baqyt, al aǵaıyn túrik halqyna mol yrys pen qut-bereke tileıtinin jetkizdi.
