28 قازاندا استانا قالالىق ب.مايلين اتىنداعى №52 مەكتەپ-گيمنازياسىندا سەمينار فورماتىندا «ءبىز - الاشتىڭ ۇرپاعى» اتتى كەزدەسۋ ساباعى ءوتتى، دەپ جازادى "ادىرنا" ۇلتتىق پورتالى.
الاش يدەيالارىن نۇرشا ورازاحىنوۆانىڭ «ساتىلاي كەشەندى وقىتۋ» تەحنولوگياسى ارقىلى مەكتەپ تاجىريبەسىندە ىسكە اسىرۋ جانە ولاردىڭ ەڭبەكتەرىن جاس ۇرپاققا كەڭىنەن ۇعىندىرىپ، دامىتۋدى ماقسات ەتكەن بۇل شارانىڭ باستى كەيىپكەرلەرى ۇستاز بەن شاكىرت بولدى.
"ۇلت ۇستازى احمەت بايتۇرسىنۇلى مىناداي وسيەت ءسوز قالدىرعان: «الاشقا اتى شىققان ادامدار! كوسەمدىكتەرىڭدى اداسپاي ءتۇزۋ ىستەڭدەر! سەندەر اداسساڭدار، ارتتارىڭنان الاش اداسادى، ارتتارىڭنان ەرگەندەردىڭ وبال-ساۋابىنا سىزدەر قالاسىزدار!". سوندىقتان، بىزدەر، ۇستازدار قاۋىمى الاش زيالىلارى اڭساعان ۇرپاققا تاربيە مەن ءبىلىم بەرۋدە ۇلتتىق قۇندىلىقتارى بويىنا سىڭگەن جاڭا قازاقستاننىڭ بولاشاق تۇلعالارىن قالىپتاستىرۋدامىز. بۇگىنگى شارامىز سونىڭ باستاماسى دەپ ويلايمىز", - دەدى ءوز سوزىندە ن.الجانبايقىزى.
بىلتىرعى وقۋ جىلىنان بەرى استانا قالاسىندا «ساتىلاي كەشەندى وقىتۋ» تەحنولوگياسى زەرتحاناسىنىڭ اياسىندا ب.مايلين اتىنداعى №52 مەكتەپ-گيمنازيا، م.شوقاي اتىنداعى №51 مەكتەپ-گيمنازيا، №72 مەكتەپ-ليتسەي، س.سەيفۋللين اتىنداعى №80 مەكتەپ-گيمنازيا، «شەيح ءتاميم بەن حاماد ءال-تاني اتىنداعى №85 مەكتەپ-ليتسەي» ۇستازدارى قازاق ءتىلى مەن ادەبيەتى پاندەرىن وقىتۋدا الاش زيالىلارىنىڭ پەداگوگيكا-پسيحولوگيا، ادىستەمە سالاسىنداعى مۇرالارىن باسشىلىققا الىپ جۇمىس جاساپ ءجۇر.
مەكتەپ ديرەكتورى ۇلبولسىن بەكمىرزاقىزى وسى ءتول تەحنولوگيانى قازاق ءتىلى، ورىس ءتىلى، اعىلشىن ءتىلى، ماتەماتيكا، تاريح پاندەرىندە قولدانۋدىڭ ارقاسىندا 52-مەكتەبىنىڭ ءبىلىم ساپاسى 78%-عا كوتەرىلگەنىن ايتتى. 72 وقۋشى حالىقارالىق وليمپيادالاردان ورىن العان. ال بۇل مەكتەپتە جالپى 48 سىنىپ وسى تەحنولوگيانى قولدانسا، ونىڭ 20 سىنىبى - ءبارىن تەز ءسىڭىرىپ الاتىن 1-سىنىپ وقۋشىلارى. سونىمەن قاتار، وسى ءادىستى مەڭگەرگەن، قولداناتىن مۇعالىمدەر وقۋ- ادىستەمەلىك كەشەن جازىپ ءجۇر.
پەداگوگيكا عىلىمدارىنىڭ دوكتورى، پروفەسسور ورازاحىنوۆا نۇرشا الجانبايقىزىنىڭ الاش ارىستارىنىڭ يدەيالىق ەڭبەكتەرىنىڭ نەگىزىندە جاساعان «ساتىلاي كەشەندى وقىتۋ» تەحنولوگياسى – ۇزاق جىلدان بەرى ءوز ومىرشەڭدىگىن دالەلدەگەن ءتول تەحنولوگيا.
ءىس-شارا بارىسىندا اتالعان جوبانىڭ قازىرگى ءبىلىم جۇيەسىندەگى ورنى، ءبىلىم الۋشىلاردى تەحنولوگيا بويىنشا وقىتۋدىڭ ماڭىزدىلىعى، انا ءتىلىن دامىتۋداعى ءرولى تۋرالى تالقىلاۋلار بولدى. سكو تەحنولوگياسىندا مۇعالىمدەر الاش ارىستارىنىڭ مۇرا ەتىپ قالدىرعان ناقىل سوزدەرىن كۇندەلىكتى ساباقتارىندا تىلدىك بىرلىكتەردى تالداۋدىڭ نىسانا ەتىپ الىپ، وقۋشىلارىمەن ۇنەمى ويتولعاۋ جۇمىسىن جۇرگىزەدى. سول ارقىلى ءتىل ءبىلىمى سالالارىن تەرەڭ، نىق مەڭگەرۋمەن قاتار ويلارىن ەركىن، ايشىقتى جەتكىزۋگە داعدىلانادى.
قوعام قايراتكەرى ورازگۇل اسانعازى ۇستاز بەن شاكىرتتىڭ سول داعدىلارىن تانىتاتىن ءبىلىم كورىنىسىنە تامسانا كەلىپ، وسى جولدىڭ مۇراتى بيىك ەكەنىنە سەنىپ، ساتتىلىك تىلەدى. ال PhD عىلىم دوكتورى، الاشتانۋشى، جۋرناليست الما سايلاۋقىزى “ماعجان جۇمابايۇلىنىڭ پەداگوگيكاسىنداعى ۇلتتىق تانىم” اتتى پرەزەنتاتسيا جاساپ، مۇعالىمدەرگە الاشتىقتار ارتقان جاۋاپكەرشىلىك جۇگىن ناقتى ۇلتتىق سيپاتتاعى مىسالدارمەن پايىمداپ بەردى.
ش.شاياحمەتوۆ اتىنداعى ء"تىل-قازىنا" ۇلتتىق عىلىمي-پراكتيكالىق ورتالىعى ادىستەمە باسقارماسىنىڭ باسشىسى، ف.ع.ك. جازيرا ماقسۇتقىزى ىسقاقوۆا جانە ى.التىنسارين اتىنداعى ۇلتتىق ءبىلىم اكادەمياسىنىڭ جەتەكشى عىلىمي قىزمەتكەرى گۇلداريعا مەرەكەبايقىزى كەنجەباەۆا دا بۇل تەحنولوگيانىڭ تيىمدىلىگى مەن ماڭىزىنا توقتالىپ، العىستارىن ءبىلدىردى.
رۋحاني-تانىمدىق ءبىلىم كەشىنىڭ ءسانىن كىرگىزگەن ءانشى جاڭاباي وتەگەنوۆ بولدى. حالىق ىقىلاسىنا بولەنىپ جۇرگەن دارىندى ونەرپاز ماعجاننىڭ قوس بىردەي ولەڭىنە، اتاپ ايتار بولساق، “تۇركىستان” مەن “مەن جاستارعا سەنەمىن” ولەڭدەرىنە ءان جازعان ەكەن. سول تۋىندىلاردى دومبىراسىن كۇمبىرلەتە تۇرىپ شىرقاپ بەردى.
"ادىرنا" ۇلتتىق پورتالى
