«Samruk-Kazyna Trust» الەۋمەتتىك جوبالاردى دامىتۋ قورىنىڭ قولداۋىمەن جوندەۋ جۇرگىزىلىپ، جاڭا وڭالتۋ جابدىعى ورناتىلعان «زەيىن-اتىراۋ» ەرەكشە بالالاردى دامىتۋ ورتالىعىندا سالتاناتتى اشىلۋ ءراسىمى ءوتتى. سونىمەن قاتار، ورتالىقتا، «سامۇرىق-قازىنا» اق كومپانيالار توبى اتىنان توماتيس-تەراپيانىڭ زاماناۋي ادىستەمەسى ەنگىزىلىپ، بالالارمەن ساباق وتكىزۋگە ارنالعان سەنسورلىق بۇرىش جاسالدى جانە بالالار باسسەينى ورناتىلدى. جوبانىڭ قۇنى 27 ميلليون تەڭگەدەن اسىپ وتىر.
«ءبىز 2019 جىلدان بەرى «ينكليۋزيا بولاشاق اتىراۋ» قوعامدىق بىرلەستىگىمەن ىنتىماقتاسىپ كەلەمىز جانە سەرىكتەستەرىمىزدە بولىپ جاتقان وڭ جاڭالىقتارعا قۋانىشتىمىز. ەرەكشە بالالارعا ارنالعان دامۋ ورتالىعىنىڭ باسشىلىعى تىنىمسىز ىزدەنىپ، بالالاردى وڭالتۋعا بارىنشا تاماشا جاعداي جاساۋعا كۇش سالاتىنى قۇپتاۋعا تۇرارلىق. «سامۇرىق-قازىنا» اق پورتفەلدىك كومپانيالارى بەن ەنشىلەس ۇيىمدارى جۇمىس ىستەيتىن وڭىرلەردە الەۋمەتتىك باستامالاردى قولداۋ ارقىلى، ءبىز، بۇكىل ەل بويىنشا ءومىر ءسۇرۋ ساپاسىن بىرگە جاقسارتامىز»، - دەپ اتاپ ءوتتى «Samruk-Kazyna Trust» الەۋمەتتىك جوبالاردى دامىتۋ قورىنىڭ باس ديرەكتورى الفيا اديەۆا.
مۇندا اي سايىن 102 بالا وڭالتۋدان وتەدى. ءۇش جىل ىشىندە ورتالىقتا تاربيەلەنگەن 30-عا جۋىق ەرەكشە بالا قاتارلاستارىمەن بىرگە بالاباقشاعا بارۋعا مۇمكىندىك الدى، ال 15 بالا مەكتەپ تابالدىرىعىن اتتادى.
«بيىل «Samruk-Kazyna Trust» قورىنىڭ قولداۋىمەن «زەيىن-اتىراۋ» ەرەكشە بالالاردى دامىتۋ ورتالىعىندا ەرەكشە ءبىلىم بەرۋ قاجەتتىلىكتەرى بار 50 بالاعا 120 تەگىن كۋرس ۇيىمداستىرىلۋدا»، - دەدى ورتالىق باسشىسى ارايلىم نۇعمانوۆا.
ورتالىق پسيحيكالىق جانە سويلەۋ قابىلەتى بۇزىلعان، اۋتيزم، تسەرەبرالدى سال اۋرۋى جانە داۋن سيندرومى بار بالالاردى جان-جاقتى دامىتۋمەن اينالىسادى. ورتالىقتا بالالارعا اۆا-تەراپيا، نەيروگيمناستيكا، سەنسورلىق ينتەگراتسيا، بەيىمدەلگەن سپورت ادىستەرى ارقىلى كەشەندى كوزقاراس قولدانىلادى جانە لوگوپەد، پسيحولوگ قىزمەتتەرى كورسەتىلەدى.
