اقتوبەدەگى ارنايى مەكەمەدە اقىل-ويى كەم بالالار سوققىعا جىعىلعان. پروكۋرورلار No1 الەۋمەتتىك قىزمەت كورسەتۋ ورتالىعىنداعى زورلىق-زومبىلىق فاكتىلەرى بويىنشا تەكسەرۋ جۇمىستارىن باستادى، دەپ حابارلايدى "ادىرنا" ءتىلشىسى اقتوبە وبلىسى پروكۋراتۋراسىنىڭ ءباسپاسوز قىزمەتىنە سىلتەپ.
ءساۋىردىڭ 28-ءى كۇنى اقتوبە قالاسى استانا اۋدانىنىڭ پروكۋراتۋراسىنا «No1 الەۋمەتتىك قىزمەت كورسەتۋ ورتالىعى» كمم-دە بالالاردىڭ سوققىعا جىعىلعانى تۋرالى حابار كەلىپ ءتۇستى. پروكۋراتۋرا مەكەمەدە پسيحيكالىق دامۋى تەجەلگەن، تسەرەبرالدى سال اۋرۋى، داۋن سيندرومى، بارلىق دارەجەدەگى پسيحيكالىق دامۋى تەجەلگەن بالالار بار ەكەنىن ءتۇسىندىردى.
«پروكۋرورلار دەرەۋ مەكەمەگە بارىپ، بەينەباقىلاۋ كامەرالارىن كورگەننەن كەيىن ورتالىق قىزمەتكەرلەرى كامەلەتكە تولماعان وقۋشىلاردى بىرنەشە رەت ۇرىپ-سوعىپ، باسقا دا زورلىق-زومبىلىق ارەكەتتەرىن جاساعانىن انىقتادى»، - دەلىنگەن حابارلامادا.
اۋدان پروكۋراتۋراسى قر قىلمىستىق كودەكسىنىڭ 110-بابىنىڭ 2-بولىگى «ازاپتاۋ» بويىنشا سوتقا دەيىنگى تەرگەۋ امالدارىن باستادى. قىلمىستىق ءىس ماتەريالدارى اقتوبە قالالىق ءىىب-نە جىبەرىلدى.
تەرگەۋ امالدارى جۇرگىزىلۋدە.
"ادىرنا" ۇلتتىق پورتالى
