"مەملەكەتتەرىمىزدىڭ اراسىندا ەشقانداي تۇيتكىل جوق" - توقاەۆ جاپاروۆپەن كەزدەستى

2224
Adyrna.kz Telegram

قاسىم-جومارت توقاەۆ ورتالىق ازيا مەملەكەتتەرى باسشىلارىنىڭ جانە ەۋروپالىق كەڭەس پرەزيدەنتىنىڭ كەزدەسۋىنە ارنايى كەلگەن قىرعىزستان پرەزيدەنتى سادىر جاپاروۆپەن كەزدەستى. بۇل تۋرالى اقوردانىڭ ءباسپاسوز قىزمەتى حابارلادى، دەپ جازادى "ادىرنا" ۇلتتىق پورتالى.

قاسىم-جومارت توقاەۆ سادىر جاپاروۆقا ءىلتيپات ءبىلدىرىپ، استانادا وتەتىن ماڭىزدى جيىنعا قاتىسۋ ءۇشىن ارنايى كەلگەنىنە ريزاشىلىعىن ءبىلدىردى.

– ءسىزدىڭ بۇل ساپارىڭىز ماڭىزدى. ەلدەرىمىزدىڭ اراسىنداعى قارىم-قاتىناستاردى ودان ءارى ىلگەرىلەتۋ ماقساتىمەن ەكى جاقتى كەزدەسۋ وتكىزىپ وتىرمىز. مەملەكەتتەرىمىزدىڭ اراسىندا ەشقانداي تۇيتكىل جوق. بىرلەسكەن كۇش-جىگەرىمىزدىڭ ارقاسىندا وسى جەتىستىكتەرىمىز ەسەلەنىپ، ەكىجاقتى سەرىكتەستىگىمىز قارقىندى دامي بەرەدى دەپ سەنەمىن، – دەدى قاسىم-جومارت توقاەۆ.

سادىر جاپاروۆ بۇگىنگى ماڭىزدى كەزدەسۋگە شاقىرعانى ءۇشىن قازاقستان پرەزيدەنتىنە العىس ايتتى.

– ورتالىق ازيا مەملەكەتتەرى باسشىلارىنىڭ جانە ەۋروپالىق كەڭەس پرەزيدەنتىنىڭ ءبىرىنشى كەزدەسۋىنە قاتىسۋ ءۇشىن استاناعا كەلگەنىمە قۋانىشتىمىن. ءبىز قىرعىز-قازاق قارىم-قاتىناسىن جوعارى باعالايمىز. وسى ءساتتى پايدالانا وتىرىپ، مەملەكەتتەرىمىزدىڭ اراسىنداعى ديپلوماتيالىق قاتىناستاردىڭ ورناعانىنا 30 جىل تولۋىمەن قۇتتىقتايمىن، – دەدى سادىر جاپاروۆ.

مەملەكەتتەر باسشىلارى ەكى ەل ۇكىمەتتەرىنىڭ ساۋدا سالاسىندا بىرلەسە اتقارىپ جاتقان جۇمىستارىنىڭ وڭ ناتيجەلەرىن جوعارى باعالادى. ەكى ەل اراسىنداعى تاۋار اينالىمى بىلتىرعى وسى كەزەڭمەن سالىستىرعاندا 17,7 پايىزعا وسكەن. ەكىجاقتى ساۋدا-ساتتىق كولەمىن 2 ميلليارد دوللارعا دەيىن جەتكىزۋ ماقساتى جوسپارعا سايكەس جۇرگىزىلىپ جاتىر.

سونداي-اق تاراپتار قازاق-قىرعىز قاتىناستارىنىڭ كولىك-لوگيستيكالىق، مادەني-گۋمانيتارلىق اسپەكتىلەرىن تالقىلادى.

پىكىرلەر