Qasym-Jomart Toqaev Ortalyq Azııa memleketteri basshylarynyń jáne Eýropalyq Keńes Prezıdentiniń kezdesýine arnaıy kelgen Qyrǵyzstan Prezıdenti Sadyr Japarovpen kezdesti. Bul týraly Aqordanyń baspasóz qyzmeti habarlady, dep jazady "Adyrna" ulttyq portaly.
Qasym-Jomart Toqaev Sadyr Japarovqa iltıpat bildirip, Astanada ótetin mańyzdy jıynǵa qatysý úshin arnaıy kelgenine rızashylyǵyn bildirdi.
– Sizdiń bul saparyńyz mańyzdy. Elderimizdiń arasyndaǵy qarym-qatynastardy odan ári ilgeriletý maqsatymen eki jaqty kezdesý ótkizip otyrmyz. Memleketterimizdiń arasynda eshqandaı túıtkil joq. Birlesken kúsh-jigerimizdiń arqasynda osy jetistikterimiz eselenip, ekijaqty seriktestigimiz qarqyndy damı beredi dep senemin, – dedi Qasym-Jomart Toqaev.
Sadyr Japarov búgingi mańyzdy kezdesýge shaqyrǵany úshin Qazaqstan Prezıdentine alǵys aıtty.
– Ortalyq Azııa memleketteri basshylarynyń jáne Eýropalyq Keńes Prezıdentiniń birinshi kezdesýine qatysý úshin Astanaǵa kelgenime qýanyshtymyn. Biz qyrǵyz-qazaq qarym-qatynasyn joǵary baǵalaımyz. Osy sátti paıdalana otyryp, memleketterimizdiń arasyndaǵy dıplomatııalyq qatynastardyń ornaǵanyna 30 jyl tolýymen quttyqtaımyn, – dedi Sadyr Japarov.
Memleketter basshylary eki el úkimetteriniń saýda salasynda birlese atqaryp jatqan jumystarynyń oń nátıjelerin joǵary baǵalady. Eki el arasyndaǵy taýar aınalymy byltyrǵy osy kezeńmen salystyrǵanda 17,7 paıyzǵa ósken. Ekijaqty saýda-sattyq kólemin 2 mıllıard dollarǵa deıin jetkizý maqsaty josparǵa sáıkes júrgizilip jatyr.
Sondaı-aq taraptar qazaq-qyrǵyz qatynastarynyń kólik-logıstıkalyq, mádenı-gýmanıtarlyq aspektilerin talqylady.
