مەملەكەت باسشىسى قاسىم-جومارت توقاەۆ ءوزىنىڭ جولداۋىندا: «جاستارعا جان-جاقتى قولداۋ كورسەتۋ – مەملەكەتىمىزدىڭ باستى مىندەتىنىڭ ءبىرى. ەڭبەكپەن قامتيتىن ءتۇرلى شارالار ارقىلى كەلەسى جىلى 100 مىڭ جاستى جۇمىسقا ورنالاستىرۋىمىز كەرەك»، دەپ باسىپ ايتقان ەدى. بۇگىنگى كۇنى جەر-جەردە جۇمىسپەن قامتۋ شارالارى قارقىن العان، دەپ حابارلايدى «ادىرنا» ءتىلشىسى.
الماتىدا جاستاردىڭ ەڭبەك نارىعىن زەرتتەۋىنە جانە ءبىر جەردە بىرنەشە جۇمىس بەرۋشىلەرمەن تىكەلەي بايلانىس ورناتۋعا تاماشا مۇمكىندىك بەرەتىن بوس جۇمىس ورىندار جارمەڭكەسى ءوتتى.
جارمەڭكەگە 160-تان استام جۇمىس بەرۋشى قاتىسۋعا نيەت ءبىلدىردى، ولار ءوندىرىس جانە قىزمەت كورسەتۋ، ونىڭ ىشىندە ساۋدا، قوعامدىق تاماقتانۋ، مەديتسينا، ءبىلىم بەرۋ سالاسىندا 3500-دەن استام بوس جۇمىس ورىندارىن ۇسىندى. جارمەڭكەگە 3000-نان استام ادام كەلىپ، كەڭەس الدى، بۇل رەتتە 1000-نان استام ىزدەنۋشى جۇمىسقا ورنالاستىرىلدى.
ازاماتتاردىڭ جەكەلەگەن ساناتتارىنا: پروباتسيا قىزمەتىندە ەسەپتە تۇرعان، باس بوستاندىعىنان ايىرۋ ورىندارىنان بوساتىلعان مۇمكىندىگى شەكتەۋلى ادامدارعا، سونداي-اق اليمەنت تولەۋ جونىندەگى بورىشكەرلەرگە ەرەكشە نازار اۋدارىلدى. ول ءۇشىن جارمەڭكەگە ازاماتتاردىڭ وسىنداي ساناتتارى ءۇشىن جۇمىس ورىندارىن قۇرۋ بويىنشا كۆوتالارى بار جۇمىس بەرۋشىلەر شاقىرىلدى.
بوس ورىندار جارمەڭكەلەرى –جۇمىس بەرۋشىلەر ءۇشىن جارمەڭكە ءوز كەزەگىندە قولايلى ۇمىتكەرلەردى تابۋ جانە جالداۋ پروتسەسىن جەڭىلدەتەدى. ءىس-شارا جۇمىس بەرۋشىلەر ءۇشىن دە، ىزدەنۋشىلەر ءۇشىن دە وتەۋسىز نەگىزدە وتكىزىلەدى.
جارمەڭكەنى الماتى قالاسى اكىمدىگىنىڭ قولداۋىمەن جۇمىسپەن قامتۋ جانە الەۋمەتتىك باعدارلامالار باسقارماسىنىڭ «الماتى قالاسى اكىمدىگىنىڭ حالىقتى جۇمىسپەن قامتۋ ورتالىعى» كمم ۇيىمداستىردى.
