قاراعاندى وبلىسىندا جىل باسىنان بەرى 860-تان استام مۇگەدەك ادام جۇمىسپەن قامتىلدى. بۇل ساناتتى جۇمىسقا ورنالاستىرۋعا كومەكتەسۋ ءۇشىن بارلىق تەتىكتەر پايدالانىلادى: بوس جۇمىس ورىندارىنا جولدامالاردان باستاپ ارنايى جۇمىس ورىندارىنا دەيىن جانە ءوز ءىسىن اشۋعا ارنالعان گرانتتارعا دەيىن. بيىل وڭىردە مۇگەدەكتەر ءۇشىن جۇمىس ورىندارىنا كۆوتا 291-گە دەيىن ۇلعايتىلدى. الايدا مۇمكىندىكتەر الدەقايدا كوپ دەپ ەسەپتەيدى وبلىس اكىمى ەرماعانبەت بولەكپاەۆ.
ايماق باسشىسى مۇمكىندىگى شەكتەۋلى جانداردى جۇمىسقا ورنالاستىرۋ جاعدايىن جەكە باقىلاۋىندا ۇستايدى. كەزەكتى كەڭەستە ول جۇمىستى، ونىڭ ىشىندە بيزنەسپەن جۇمىستى كۇشەيتۋ مىندەتىن قويدى.
– بۇل ماسەلەمەن بەلسەندى تۇردە اينالىسىپ، تاسىلدەردى قايتا قاراۋ قاجەت. بىزدە جاڭا كاسىپورىندار اشىلۋدا، وندا دا مۇگەدەكتىگى بار ادامدار ءۇشىن جۇمىس ورىندارىن قۇرۋعا بولادى. سويلەسىڭىزدەر، ناقتى مىسالدار كورسەتىڭىزدەر. تاعى دا اتاپ وتكىم كەلەدى: الەۋمەتتىك قولداۋ جانە مۇگەدەكتىگى بار ادامداردىڭ ءومىر ءسۇرۋ جاعدايىن جاقسارتۋ ءبىز ءۇشىن باسىم باعىت جانە جالپى مەملەكەتتىك ساياساتتىڭ ماڭىزدى بولىگى بولىپ تابىلادى. كۆوتانى ۇلعايتۋ، سونداي-اق اقپاراتتىق جۇمىستى كۇشەيتۋ قاجەت، – دەدى ەرماعانبەت بولەكپاەۆ.
جۇمىسپەن قامتۋدى ۇيلەستىرۋ جانە الەۋمەتتىك باعدارلامالار باسقارماسىنىڭ مالىمەتىنشە، وبلىستا 54 690 مۇگەدەك تۇرادى، ولاردىڭ جارتىسى ەڭبەككە جارامدى.
باسقارما باسشىسى عالىمجان سپابەكوۆ حابارلاعانداي، جىل باسىنان بەرى كۆوتا بويىنشا 153 ادام جۇمىسقا ورنالاستى. ول بۇكىل پروتسەستى باقىلايتىن اۆتوماتتاندىرىلعان جۇيە تۋرالى ايتىپ بەردى. ەلەكتروندىق ەڭبەك بيرجاسىندا كۆوتا بەلگىلەنگەن جۇمىس بەرۋشىلەردىڭ تىزبەسى جاريالاندى. مانساپتىق ورتالىقتار جۇمىسقا ۇمىتكەرلەردى تابۋعا بەلسەندى كومەكتەسەدى. كۆوتانىڭ ورىندالماۋى اۆتوماتتى تۇردە ەڭبەك ينسپەكتسياسىنا جىبەرىلەدى.
سونىمەن قاتار، وبلىستا مۇمكىندىگى شەكتەۋلى جاندارعا كومەك كورسەتۋ ءۇشىن JOB COACH جاڭا جوباسى ىسكە قوسىلدى. مانساپتىق ورتالىقتاردىڭ ماماندارى قامقورلىقتاعىلاردى جۇمىس ورنىندا تولىق بەيىمدەلگەنگە دەيىن سۇيەمەلدەۋ ءۇشىن وقىتۋدان ءوتتى. قاراعاندىدا مۇمكىندىگى شەكتەۋلى جاندارعا كەڭەس بەرۋ جانە جۇمىسقا ورنالاستىرۋ ورتالىعىن اشۋ جوسپارلانۋدا.
