جەزقازعان اۋەجايىندا ۇشاق قونعاننان كەيىن وبلىس باسشىسىنا جەكە كولىك بەرىلگەندە ۇلىتاۋ وبلىسىنىڭ اكىمى بەرىك ابدىعاليۇلى ۆيدەوعا ءتۇسىپ قالعان. جاعدايعا قاتىستى اكىمدىكتىڭ ءباسپاسوز قىزمەتى تۇسىنىكتەمە بەردى، دەپ حابارلايدى “ادىرنا” ۇلتتىق پورتالى.
بلوگەر تۇسىرگەن ۆيدەودا وبلىس اكىمى بەرىك ابدىعاليۇلى جەزقازعان اۋەجايىندا ۇشاقتان ءتۇسىپ، ونى قىزمەتكەر كۇتىپ الىپ، بولەك اۆتوبۋسقا شىعارىپ سالعانى كورسەتىلگەن. بۇل بلوگەردىڭ اشۋىن كەلتىردى.
بلوگەر اۋەجاي قىزمەتكەرىنەن كامەرانى جىلجىتىپ، اۆتوبۋسقا كولىكپەن اكەلىنگەن قارت ايەلدى نۇسقاپ: "نەگە اكىمدى كولىكتە قارسى الىپ جاتىرسىڭ؟ اربادا وتىرعان اجە بار، ال ول اۆتوبۋستا", - دەپ سۇرادى..
ۇلىتاۋ وبلىسى اكىمدىگىنىڭ ءباسپاسوز قىزمەتىنىڭ حابارلاۋىنشا، وقيعا 20 قازاندا بولعان. اكىمدى شاعىن اۆتوبۋستا قارسى الۋ اۋەجاي باسشىلىعىنىڭ باستاماسى بولدى.
«جەزقازعان اۋەجايىنىڭ يەسى «قازاقمىس» كورپوراتسياسى» جشس بولىپ تابىلادى. وبلىس بيۋدجەتىندە وبلىس باسشىلىعىن جەڭىلدىكتى كولىكتەر ارقىلى الىپ جۇرۋگە قارجى قاراستىرىلماعان. سايكەسىنشە، وبلىس اكىمىنىڭ كەزدەسۋى اۋەجاي باسشىلىعىنىڭ باستاماسىمەن ءوتتى. جالپى، ءوڭىر باسشىسى ءىسساپارلارى كەزىندە قالانىڭ اۋە ايلاعىنىڭ ورتاق جولاۋشىلار كولىگىن ۇنەمى پايدالاناتىنىن مالىمدەيمىز»، - دەپ حابارلادى وبلىس اكىمدىگىنىڭ ءباسپاسوز قىزمەتى.
ەسكە سالايىق، 2022 جىلدىڭ 11 ماۋسىمىندا ەلباسىنىڭ جارلىعىمەن بەرىك ابدىعاليۇلى ۇلىتاۋ وبلىسىنىڭ اكىمى بولىپ تاعايىندالدى.
