Ұлытау өңірінің басшысын әуежайдан түсірген видео түсіндірілді

2381
Adyrna.kz Telegram

Жезқазған әуежайында ұшақ қонғаннан кейін облыс басшысына жеке көлік берілгенде Ұлытау облысының әкімі Берік Әбдіғалиұлы видеоға түсіп қалған. Жағдайға қатысты әкімдіктің баспасөз қызметі түсініктеме берді, деп хабарлайды “Адырна” ұлттық порталы.

Блогер түсірген видеода облыс әкімі Берік Әбдіғалиұлы Жезқазған әуежайында ұшақтан түсіп, оны қызметкер күтіп алып, бөлек автобусқа шығарып салғаны көрсетілген. Бұл блогердің ашуын келтірді.

Блогер әуежай қызметкерінен камераны жылжытып, автобусқа көлікпен әкелінген қарт әйелді нұсқап: "Неге әкімді көлікте қарсы алып жатырсың? Арбада отырған әже бар, ал ол автобуста", - деп сұрады..

Ұлытау облысы әкімдігінің баспасөз қызметінің хабарлауынша, оқиға 20 қазанда болған. Әкімді шағын автобуста қарсы алу әуежай басшылығының бастамасы болды.

«Жезқазған әуежайының иесі «Қазақмыс» корпорациясы» ЖШС болып табылады. Облыс бюджетінде облыс басшылығын жеңілдікті көліктер арқылы алып жүруге қаржы қарастырылмаған. Сәйкесінше, облыс әкімінің кездесуі әуежай басшылығының бастамасымен өтті. Жалпы, өңір басшысы іссапарлары кезінде қаланың әуе айлағының ортақ жолаушылар көлігін үнемі пайдаланатынын мәлімдейміз», - деп хабарлады облыс әкімдігінің баспасөз қызметі.

Еске салайық, 2022 жылдың 11 маусымында Елбасының Жарлығымен Берік Әбдіғалиұлы Ұлытау облысының әкімі болып тағайындалды.

Пікірлер