ءبىر توپ دەپۋتات پروكۋراتۋراعا قازاق تىلىندە جاۋاپ بەرۋ “مادەنيەتتىڭ كورىنىسى ەمەس” دەپ ايتقان Chocolife كومپانياسىنىڭ ديرەكتورى راميل مۋحورياپوۆتىڭ ۇستىنەن شاعىم ءتۇسىردى. بۇل تۋرالى ەدىل جاڭبىرشين ايتتى، دەپ حابارلايدى «ادىرنا» ءتىلشىسى.
«ءتىلسىز ۇلت بولمايدى! قازاقستان قۇقىقتىق مەملەكەت جانە ونىڭ ءار ءبىر ازاماتى ەلىمىزدىڭ كونستيتۋتسياسىن جانە ونىڭ زاڭدارىن مۇلتىكسىز ورىنداۋعا مىندەتتى. مەملەكەتىمىزدىڭ رامىزدەرىنە قاتىستى جانە وندا تۇرىپ جاتىرعان ازاماتتاردىڭ ءدىني كوزقاراسىنا، ناسىلىنە، جەكە باسىنا جانە ار-نامىسىنا تيەتىن زاڭ بۇزۋشىلىقتارعا جول بەرىلمەۋى كەرەك.
ۇلتى ءۇشىن كۇرەسكەن تۇلعالاردى ادەيى قولدان جاسالعان "ۇلتشىل" دەگەن ءسوز تاۋىپ الىپ، سول تاڭبامەن جالا جاۋىپ، وتارشىل ەلدەر ءبىزدى قۇرتۋعا ەڭبەكتەندى.
ەگەر مەن ءوز ۇلتىمنىڭ ءدىنىن، ءتىلىن، سالت-ءداستۇرىن، ادەت-عۇرپىن قورعاسام، ول "ۇلتشىلدىق" ەمەس! ول — ۇلتىمدى جويىلۋدان قورعاۋ! مىسالى فرانتسۋز، اعىلشىن، يسپان، ورىس، قىتاي، ەۆرەي، نەمىس ءوز ءتىلىن جانە ءداستۇرىن قورعاسا "ۇلتشىل" ەمەس، ال قازاق قازاقشىلىعىن، ءتىلىن ءداستۇرىن قورعاسا "ۇلتشىل" ما؟! ولار ۇستانىپ وتىرعان پرينتسيپتەردى، بىزدەردە ۇستانۋعا قۇقىلىمىز! ەشكىم ەشكىمنەن ۇستەم ەمەس، ەشكىم ەشكىمنەن كەم ەمەس!
بىراق ەسكەرەتىن ءبىر جايت بار! زاڭ بۇزۋشىلارعا تەك زاڭ اياسىندا شارا قولدانۋىمىز كەرەك! ايتپەسە ولاردان ايىرماشىلىعىمىز قانداي؟ ال ەگەر زاڭ سولقىلداق بولسا، وندا ونى قايتا قاراۋ كەرەك. قوعامداعى قازىرگى تۋىنداپ وتىرعان جاعدايلار مەملەكەت ءتىلدىڭ مارتەبەسى تۋرالى زاڭ قابىلداۋدىڭ ۋاقىتى كەلگەنىن دە كورسەتىپ وتىر.
قازاقستاننىڭ مەملەكەتتىك تىلىندە سويلەۋدىڭ "مادەنيەتسىزدىك" ەكەنىن ايتىپ، قوعامدا داۋ تۋعىزعان ر. مۋحورياپوۆقا زاڭ اياسىندا شارا قولدانۋ جونىندەگى دەپۋتاتتىق ساۋالدى، ماجىلىستەگى "جاڭا قازاقستان" دەپۋتاتتىق توبىنىڭ بىرنەشە مۇشەسى قول قويىپ، قازاقستان رەسپۋبليكاسىنىڭ باس پروكۋرورى بەرىك اسىلوۆ مىرزاعا جولدادى»،—دەدى ول.
