ازەربايجاننىڭ شۋشا قالاسىندا تۇركى مەملەكەتتەرى ۇيىمى مۇفتيلەر كەڭەسىنىڭ ەرەجەسى بەكىتىلدى. بۇل تۋرالى قازاقستان مۇسىلماندارى ءدىني باسقارماسىنىڭ ءباسپاسوز قىزمەتى جاريالادى، دەپ حابارلايدى “ادىرنا” ۇلتتىق پورتالى.
كەڭەس اياسىندا بىرلەسكەن دەكلاراتسيا قابىلداندى. جيىندا قمدب توراعاسى، باس ءمۇفتي ناۋرىزباي قاجى تاعانۇلى شۋشاداعى تاريحي باسقوسۋدىڭ ماڭىزىنا توقتالدى.
“بۇگىن وزدەرىڭىزبەن بىرگە تۇركى مەملەكەتتەرى ۇيىمىنا مۇشە ەلدەردىڭ مۇسىلماندار باسقارمالارىنىڭ باسشىلارى وسى قالادا ەرەجەنى بەكىتىپ، قول قويىلدى. ەندى تۇركى مەملەكەتتەرى مۇفتيلەرى وسى ەرەجە اياسىندا بىرىگىپ، جۇمىس ىستەيدى... بۇگىنگى ازەربايجان جەرىندەگى ءۇشىنشى وتىرىستا كەڭەستىڭ ەرەجەسى تولىق بەكىتىلدى. ەرەجە اياسىندا الداعى ۋاقىتتا بىرقاتار ءىرى جوبا، ءدىني تەرىس اعىممەن كۇرەس، تاريحي قۇندىلىقتاردى تۇگەندەۋ، عۇلامالار كەڭەسىنىڭ جيىنىن وتكىزۋ، بابالار جولىن جاڭعىرتۋ جۇمىستارى كۇتىپ تۇر. سوندىقتان كەڭەس جۇمىسىنا تابىس تىلەيمىن”، - دەدى باس ءمۇفتي.
وتىرىستا تۇركى مەملەكەتتەرى ۇيىمى مۇفتيلەر كەڭەسىنىڭ ەرەجەسى بەكىتىلىپ، ءدىن باسشىلارى قۇجاتقا قول قويدى.
