پرەزيدەنت الماتى قالاسىنىڭ اكىمى ەربولات دوساەۆقا ينفراقۇرىلىمدى جاڭارتۋ جونىندە تاپسىرما بەردى

1981
Adyrna.kz Telegram

مەملەكەت باسشىسى قاسىم-جومارت توقاەۆ الماتى قالاىنىڭ اكىمى ەربولات دوساەۆتى قابىلدادى، دەپ حابارلايدى «ادىرنا» ءتىلشىسى.

مەملەكەت باسشىسىنا الماتى قالاسىنىڭ بيىلعى توعىز ايداعى الەۋمەتتىك-ەكونوميكالىق دامۋىنىڭ الدىن الا قورىتىندىسى تۋرالى ەسەپ بەرىلدى.

قالا اكىمى پرەزيدەنتكە ەكونوميكانىڭ تۇراقتى ءوسىمىن قامتاماسىز ەتۋ جونىندەگى تاپسىرمالارىنىڭ ورىندالۋى جونىندە باياندادى.

ەسەپ بەرىلىپ وتىرعان كەزەڭدە شاھارداعى  قىسقامەرزىمدى ەكونوميكالىق ينديكاتور 105 پايىزعا جەتكەن. ­وڭدەۋشى ونەركاسىپ – ءوسىمنىڭ نەگىزگى درايۆەرىنە اينالعان. نەگىزگى كاپيتالعا سالىنعان ينۆەستيتسيا كولەمى 22,1 پايىزعا ارتقان جايى بار.

"الماتى جەكە ينۆەستيتسيالار كولەمى جونىنەن 22,4 پايىز كورسەتكىشپەن  وڭىرلەر اراسىندا ءبىرىنشى ورىندا. قالادا ىسكەرلىك بەلسەندىلىك قالپىنا كەلگەن. ماسەلەن، بيىلعى توعىز ايدا جۇمىس ىستەيتىن شاعىن جانە ورتا بيزنەس سۋبەكتىلەرىنىڭ سانى 37,2 پايىزعا ارتتى",-دەدى الماتى قالاسىنىڭ اكىمى ەربولات دوساەۆ.

قالا باسشىسى قاسىم-جومارت توقاەۆقا الماتى قالاسىن دامىتۋدىڭ 2025 جىلعا دەيىنگى باعدارلاماسىنىڭ جۇزەگە اسىرىلۋى جانە 2030 جىلعا دەيىنگى ورتامەرزىمدى پەرسپەكتيۆالارى، سونىمەن قاتار دامۋدىڭ بەكىتىلگەن نەگىزگى باسىمدىقتارىن ەسكەرە وتىرىپ، قالانىڭ 2040 جىلعا دەيىنگى جاڭا باس جوسپارىن ازىرلەۋ بارىسى تۋرالى باياندادى.

مەملەكەت باسشىسىنا ينجەنەرلىك ينفراقۇرىلىمدى دامىتۋ جۇمىستارى، مەكتەپتەردەگى ورىن تاپشىلىعىن تومەندەتۋ ءۇشىن قابىلدانىپ جاتقان شارالار، بىرىڭعاي بەينەمونيتورينگ جۇيەسىن قۇرۋ جونىندەگى تاپسىرماسىنىڭ ورىندالۋ بارىسى تۋرالى مالىمەت بەرىلدى.

كەزدەسۋ سوڭىندا پرەزيدەنت قالانىڭ ەكونوميكاسىن ودان ءارى ءارتاراپتاندىرۋ جانە ينفراقۇرىلىمىن جاڭعىرتۋ جونىندە تاپسىرما بەردى.

 

 

 

 

پىكىرلەر