"انا ءتىلىمىزدى سىيلاۋ ەڭ باستى اسپەكت. ەۆروپانىڭ قاي ەلىنە بارماساڭىز دا سول ەلدىڭ تىلىندە سويلەۋ ماڭىزدى. بۇل ەشقانداي "اسىرە ۇلتشىلدىق", باسقانى ناقاق كەمسىتۋ ەمەس". بۇل پىكىردى قر پارلامەنتى ءماجىلىسىنىڭ دەپۋتاتى ەرلان سايروۆ ءوزىنىڭ فەيسبۋك پاراقشاسىندا قالدىردى، دەپ جازادى "ادىرنا" ۇلتتىق پورتالى.
"قازاق ءتىلى جونىندە. كەشە، جەلىدە سىرتتان كەلگەن قوناق تاعى دا قازاق ءتىلى جونىندەگى ماسەلەنى قوزدىرىپ قويدى. باسقا ەلگە كەلىپ، "قوناق" بولۋدىڭ قالىپتاسقان ەرەجەلەرى بار. ەۆروپادا، فرانتسيا، گەرمانيا، پولشا باسقا دا ەلدەرگە بارىپ، تۇراقتاعىڭىز كەلسە، ەڭ ءبىرىنشى سول ەلدىڭ ءتىلىن بىلۋگە مىندەتتىسىز. بۇل "وركەنيەتتى" دەپ اتالاتىن ەلدەر ءۇشىن قالىپتى جاعداي. اقش-قا بارساڭىز اعىلشىن ءتىلىن ءبىلۋ اكسيوما. قازاقستانعا دا كوپتەگەن ازاماتتار كەلىپ جاتىر. قازاقستان مەملەكەتى گۋمانيزم تۇرعىسىنان بۇل ازاماتتاردى قابىلدادى. ول ازاماتتار دا ءبىزدىڭ ەلدە ەشقانداي فوبيانىڭ جوقتىعىنا كوزى جەتتى. دەگەنمەن، قازاقستانعا كەلگەندە ءبىزدىڭ ءداستۇردى سىيلاپ، جەرگىلىكتى حالىقتىڭ باسىمدىقتارىنا نازار اۋدارىپ، ۇرىمتال جەرگە "سۇيكەنبەگەن" ابزال", - دەپ جازدى دەپۋتات.
سايروۆتىڭ ايتۋىنشا، قازاقستانعا كەلگەننەن كەيىن، قازاق تىلىنە زەيىن ءبولۋ ادامگەرشىلىك تۇرعىسىنان دۇرىس بولادى.
"انا ءتىلىمىزدى سىيلاۋ ەڭ باستى اسپەكت. ويتكەنى، دۇنيەجۇزىندە سولاي، ەۆروپانىڭ قاي ەلىنە بارماساڭىز دا سول ەلدىڭ تىلىندە سويلەۋ ماڭىزدى. بۇل ەشقانداي "اسىرە ۇلتشىلدىق", باسقانى ناقاق كەمسىتۋ ەمەس. بۇل حالىقارالىق، "وركەنيەتى" نورما. ءبىزدىڭ ەلدە، قۇدايعا شۇكىر "اسىرە ۇلتشىلدىق", تۇرمىستىق دەڭگەيدە ءتىل ماسەلەسىندە كەمسىتۋ جوق. ءبىزدىڭ مادەنيەت سونداي. بىراق بۇل جاعداي ءتىل ماسەلەسىنىڭ وزەكتىلىگىن جوعالتپايدى. ال، ءبىزدىڭ انا ءتىلىمىزدى قادىرلەۋ ءار-ءبىر قوناقتىڭ جوعارى مادەنيەتىنىڭ كورسەتكىشى. ءبىز ەكى ءتىلدى ەركىن مەڭگەرگەنبىز عوي. ەشقانداي ايقاي-شۋعا سالىنباي، اگرەسسيا جاساماي، وكتەمدىك كورسەتپەي كەلگەن ازاماتتارعا وسى ماسەلەنى ىجداھاتپەن، پاراساتپەن ءتۇسىندىرىپ وتىرعان دۇرىس. كەي كەزدەرى پاراساتپەن، جوعارى مادەنيەتپەن، اقىل-ويمەن جەڭەتىن مەزەت بولادى. بۇگىن ءدال سونداي كەز",- دەيدى ەرلان سايروۆ.
"ادىرنا" ۇلتتىق پورتالى
