الەۋمەتتىك جەلىدە Chocolife كومپانياسىنىڭ ديرەكتورى راميل مۋحورياپوۆتىڭ رەسەيلىكتەرمەن كەزدەسۋدە ايتقان ءسوزى قىزۋ تالقىعا ءتۇستى. كەزدەسۋ بارىسىندا كومپانيا باسشىسى شەتەلدىكتەرگە قازاق تىلىندە جاۋاپ بەرۋ “مادەنيەتتىڭ كورىنىسى ەمەس” ەكەنىن ايتقان. الايدا كەيىن جازبا جاريالاپ، ازاماتتاردىڭ دۇرىس تۇسىنبەي قالعانىن مالىمدەدى، دەپ حابارلايدى "ادىرنا" ۇلتتىق پورتالى stan.kz-كە سىلتەمە جاساپ.
ۆيدەودان ايەلدىڭ رەسەيدەن كەلگەن ازاماتتارعا قازاق تىلىنە قاتىستى ءتۇسىندىرىپ جاتقانىن كورۋگە بولادى.
"ەگەر سىزگە ورىس تىلىندە ەمەس، قازاق تىلىندە سويلەسە، بۇل – اگرەسسيا ەمەس. تۇسىنىستىكپەن قاراۋعا تىرىسىڭىزدار. جەك كورۋ تۋرالى ايتۋدىڭ كەرەگى جوق", – دەيدى ول.
الايدا سپيكەردىڭ ءسوزىن بولگەن راميل مۋحورياپوۆ قازاق تىلىندە جاۋاپ بەرۋ "مادەنيەتتىڭ كورىنىسى ەمەس ەكەنىن" مالىمدەدى.
"ادام ورىس ءتىلىن راسىمەن بىلمەسە، جارايدى. ويتكەنى بۇل ءبىر ءتۇرلى، ۇلتشىلدىقتىڭ كورىنىسى. مۇنى تۇسىنۋگە بولادى. ءيا، الايدا بۇل – مادەنيەتتىڭ كورىنىسى ەمەس", – دەدى ول.
ۆيدەو قازنەتتە قىزۋ تالقىعا تۇسكەن سوڭ راميل مۋحورياپوۆ ءوز سوزىنە تۇسىندىرمە بەرىپ، جازبا جاريالادى. ونىڭ پايىمداۋىنشا، جەلى قولدانۋشىلارى دۇرىس تۇسىنبەي قالعان.
"قازاقستانعا اقىلدى جانە كوزى اشىق ادامداردىڭ كەلگەنى وتە جاقسى. ەگەر ولار ەلدە قالسا، تىپتەن جاقسى، سەبەبى بۇل – ءبىلىم مەن سالىقتىڭ اعىنى. يندرايۆەر قازاقستانعا 540 ادامدى كوشىردى، جۇزدەن اسا ءوز ازاماتتارىمىزدى جۇمىسقا الدى. ءبىر جىلدا 9 ميلليارد تەڭگە جالاقى تولەدى. ءوز باسىمدىعىڭدى كورسەتۋ، كومەكتەسپەۋ، باعانى كوتەرۋ – دۇرىس ەمەس. بۇل تەك شەتەلدىكتەرگە قاتىستى ەمەس، ءوز جەرلەستەرىمىزگە دە قاتىستى", – دەدى ول.
سونىمەن قاتار مۋحورياپوۆ ورىس تىلمەي-اق شەتەلدىكتەرگە كومەكتەسۋگە تىرىسۋدىڭ دۇرىس ءىس ەكەنىن قوسىپ ءوتتى. ايتۋىنشا، مۇنداي ارەكەت ناعىز قوناقجاي ەلدىڭ ازاماتى ەكەنىن كورسەتەدى.
"ەگەر ورىس ءتىلىن ءبىلىپ، بىراق ءوزىڭنىڭ باسىمدىعىڭدى كورسەتۋ ءۇشىن قازاق تىلىندە جاۋاپ بەرسەڭ، سەنىڭ جانىڭدا قازاقتىڭ قوناقجايلىلىعى جوق. مەن قازاق ءتىلىن قۇرمەتتەيمىن، قازاقستان – مەنىڭ وتانىم! مەنىڭ سوزدەرىمدى دۇرىس تۇسىنبەگەنىن قالامايمىن. مەن كەز كەلگەن قىسىمعا قارسىمىن", – دەپ اياقتادى كومپانيا باسشىسى.
ال Chocolife كومپانياسى حولدينگتە قازاقستاندىقتاردى جۇمىستان شىعارىپ، رەسەيلىكتەردى قابىلداپ جاتقانى تۋرالى اقپاراتتىڭ شىندىققا جاناسپايتىنىن مالىمدەدى. سوزدەرىنشە، قازىر كومپانيادا 650-گە جۋىق قىزمەتكەر جانە ولاردىڭ 100%-عا جۋىعى قازاقستاندىقتار ەكەن.
ء“بىزدىڭ پاراقشالارىمىزدا مەملەكەتتىك تىلدەگى كونتەنتتە ولقىلىقتار بار ەكەنىن كورىپ ءجۇرمىز. ءبىز بۇل كەمشىلىگىمىزدى مويىندايمىز، الداعى ۋاقىتتا قازاق تىلىندەگى كونتەنت بارلىق پاراقشالاردا قولجەتىمدى بولادى", – دەلىنگەن جازبادا.
"ادىرنا" ۇلتتىق پورتالى
