Áleýmettik jelide Chocolife kompanııasynyń dırektory Ramıl Mýhorıapovtyń reseıliktermen kezdesýde aıtqan sózi qyzý talqyǵa tústi. Kezdesý barysynda kompanııa basshysy sheteldikterge qazaq tilinde jaýap berý “mádenıettiń kórinisi emes” ekenin aıtqan. Alaıda keıin jazba jarııalap, azamattardyń durys túsinbeı qalǵanyn málimdedi, dep habarlaıdy "Adyrna" ulttyq portaly stan.kz-ke silteme jasap.
Vıdeodan áıeldiń Reseıden kelgen azamattarǵa qazaq tiline qatysty túsindirip jatqanyn kórýge bolady.
"Eger sizge orys tilinde emes, qazaq tilinde sóılese, bul – agressııa emes. Túsinistikpen qaraýǵa tyrysyńyzdar. Jek kórý týraly aıtýdyń keregi joq", – deıdi ol.
Alaıda spıkerdiń sózin bólgen Ramıl Mýhorıapov qazaq tilinde jaýap berý "mádenıettiń kórinisi emes ekenin" málimdedi.
"Adam orys tilin rasymen bilmese, jaraıdy. Óıtkeni bul bir túrli, ultshyldyqtyń kórinisi. Muny túsinýge bolady. Iá, alaıda bul – mádenıettiń kórinisi emes", – dedi ol.
Vıdeo Qaznette qyzý talqyǵa túsken soń Ramıl Mýhorıapov óz sózine túsindirme berip, jazba jarııalady. Onyń paıymdaýynsha, jeli qoldanýshylary durys túsinbeı qalǵan.
"Qazaqstanǵa aqyldy jáne kózi ashyq adamdardyń kelgeni óte jaqsy. Eger olar elde qalsa, tipten jaqsy, sebebi bul – bilim men salyqtyń aǵyny. Indraıver Qazaqstanǵa 540 adamdy kóshirdi, júzden asa óz azamattarymyzdy jumysqa aldy. Bir jylda 9 mıllıard teńge jalaqy tóledi. Óz basymdyǵyńdy kórsetý, kómektespeý, baǵany kóterý – durys emes. Bul tek sheteldikterge qatysty emes, óz jerlesterimizge de qatysty", – dedi ol.
Sonymen qatar Mýhorıapov orys tilmeı-aq sheteldikterge kómektesýge tyrysýdyń durys is ekenin qosyp ótti. Aıtýynsha, mundaı áreket naǵyz qonaqjaı eldiń azamaty ekenin kórsetedi.
"Eger orys tilin bilip, biraq ózińniń basymdyǵyńdy kórsetý úshin qazaq tilinde jaýap berseń, seniń janyńda qazaqtyń qonaqjaılylyǵy joq. Men qazaq tilin qurmetteımin, Qazaqstan – meniń Otanym! Meniń sózderimdi durys túsinbegenin qalamaımyn. Men kez kelgen qysymǵa qarsymyn", – dep aıaqtady kompanııa basshysy.
Al Chocolife kompanııasy holdıngte qazaqstandyqtardy jumystan shyǵaryp, reseılikterdi qabyldap jatqany týraly aqparattyń shyndyqqa janaspaıtynyn málimdedi. Sózderinshe, qazir kompanııada 650-ge jýyq qyzmetker jáne olardyń 100%-ǵa jýyǵy qazaqstandyqtar eken.
“Bizdiń paraqshalarymyzda memlekettik tildegi kontentte olqylyqtar bar ekenin kórip júrmiz. Biz bul kemshiligimizdi moıyndaımyz, aldaǵy ýaqytta qazaq tilindegi kontent barlyq paraqshalarda qoljetimdi bolady", – delingen jazbada.
"Adyrna" ulttyq portaly
