ىشكى ىستەر ءمينيسترى مارات احمەتجانوۆ ەسكەرتۋ جازاسىن قوعامدىق جۇمىستارعا الماستىرۋدى ۇسىندى، دەپ حابارلايدى “ادىرنا” ۇلتتىق پورتالى
مينيستر كونستيتۋتسيانىڭ جاڭا وزگەرىستەرىنە سايكەس قوعامدىق جۇمىستاردى سوت قاۋلىسىمەن دە تاعايىنداۋعا رۇقسات ەتىلگەنىن ەسكە سالدى.
"سول سەبەپتى "ەسكەرتۋ" سياقتى جازانى "قوعامدىق جۇمىستارعا" اۋىستىرۋدى ۇسىنامىز. بۇل قۇقىقبۇزۋشى ءۇشىن زاڭدى بۇزباۋعا جەتكىلىكتى موتيۆاتسيا بولادى دەپ سانايمىز", - دەدى احمەتجانوۆ ۇكىمەت وتىرىسىندا.
ءمينيستردىڭ ايتۋىنشا، قازىر ادىلەت مينيسترلىگى قوعامدىق جۇمىستاردى زاڭنامالىق رەتتەۋ ماسەلەسىن پىسىقتاپ جاتىر. ال اكىمدەر قوعامدىق جۇمىستاردىڭ تۇرلەرى مەن كولەمىن انىقتاپ، جۇمىس ورىندارىن دايىنداۋى قاجەت.
ءتيىستى باقىلاۋدى ىشكى ىستەر مينيسترلىگى جۇرگىزەدى. سونداي-اق ءىىم تۇرمىستىق زورلىق-زومبىلىققا باراتىندار ءۇشىن پسيحو-تۇزەتۋ كۋرستارىن ەنگىزۋدى جوسپارلاپ وتىر.
سونىمەن قاتار وتباسىلىق-تۇرمىستىق سالاداعى قۇقىقبۇزۋشىلىقتار بويىنشا جازانى قاتاڭداتۋ كوزدەلگەن. قايتالانعان قۇقىقبۇزۋشىلىقتار ءۇشىن اكىمشىلىك قاماۋعا الۋ مەرزىمىن 20-دان 25 تاۋلىككە دەيىن ۇزارتۋ ۇسىنىلدى.
