ءماجىلىس دەپۋتاتى گەننادي شيپوۆسكيح ءوزىن «شوۆيك» دەپ ايىپتاعاندارعا جاۋاپ بەردى، دەپ جازادى "ادىرنا" ۇلتتىق پورتالى.
«بۇل كىسى مەنى شوۆيك دەپ جاتىر ەكەن. جالپى مەن شوۆيك ەمەسپىن. بىرىنشىدەن، مەن ءوزىمدى قاشان دا قازاق دەپ سانايتىن ازاماتپىن. ەكىنشىدەن، پاۆلودار، قوستاناي، پەتروپاۆل ورىستىكى دەپ قولداپ شىعادى دەپسىز. قۇداي قالاسا، 20-21 قازان كۇندەرى اۋەلى اللا دەپ سولتۇستىك قازاقستاندا، پەتروپاۆل قالاسىندا «ۇلى دالا – ۇلتتىڭ ۇلى ءتىلى» اتتى قازاق ءتىلىنىڭ ارنايى فورۋمى بولايىن دەپ جاتىر. مەن سول جاققا بارعالى وتىرمىن. وسى ءىس-شاراداعى باستى ماقساتىم – قازاق ءتىلىن دارىپتەۋ. ياعني سولتۇستىك وڭىرلەردە پەتروپاۆل، پاۆلودار قالالارىندا قازاق ءتىلىن كەڭىنەن ەنگىزۋ بويىنشا جۇمىس اتقارىپ جاتىرمىن. بىرقاتار پانەلدىك سەسسيالاردا ءوزىم مودەراتور بولىپ، سول ءىس-شارانى جۇرگىزەمىن. سوندىقتان مەنى بىلمەي، "شوۆيك", "ورىسشانى قولدايدى" دەپ مۇنداي ارتىق اڭگىمە ايتۋدىڭ قاجەتى جوق. مەن قازاقتاردىڭ اراسىندا ءوستىم. قازاقتار مەنى كوتەردى. مەن ونى جاقسى بىلەمىن. قازاق ءتىلىنىڭ ارقاسىندا ءبىراز جەرگە باردىم. قازىر دە قازاق ءتىلىنىڭ ارقاسىندا حالىق اراسىندا سىيلى بولىپ ءجۇرمىن. مەن شوۆيك ەمەسپىن، مەن ناعىز قازاقستاندىقپىن. سىرتىم ورىس بولسا دا، جۇرەگىم قازاق. سوندىقتان ونداي اڭگىمە ايتۋ – ارتىق»، - دەدى گەننادي شيپوۆسكيح.
"ادىرنا" ۇلتتىق پورتالى
