قاراعاندى وبلىسى اكىمىنىڭ ورىنباسارى الىبەك الدەنەي وڭىردەگى ءبىلىم بەرۋ ينفراقۇرىلىمىن جاڭارتۋ باستى نازاردا ەكەنىن مالىمدەدى. ونىڭ ايتۋىنشا، ايماقتاعى 402 مەكتەپتىڭ جارتىسىنان كوبى 50 جىل بۇرىن سالىنعان، سوندىقتان جاڭا ءبىلىم نىساندارىن تۇرعىزۋ – ەڭ وزەكتى مىندەتتەردىڭ ءبىرى. قازىردىڭ وزىندە ون جاڭا مەكتەپتىڭ جەر تەلىمى بەلگىلەنىپ، قاراعاندى، قارقارالى، پريوزەرسك قالالارى مەن نۇرا كەنتىندە ەسكى مەكتەپتەردىڭ ورنىنا زاماناۋي ءبىلىم وشاقتارى سالىنباق.
وڭىردە مەكتەپتەردى قايتا جاڭعىرتۋ اياسىندا 260-تان استام نىسان جوندەلدى. ونىڭ ىشىندە 33 نىسانعا 8,1 ملرد تەڭگەگە كۇردەلى، ال 232 نىسانعا 7,2 ملرد تەڭگەگە جوندەۋ جۇرگىزىلدى.
بۇل – تەك قابىرعانى سىرلاۋ ەمەس، ءتۇپتىڭ تۇبىندە ءبىلىم ساپاسىن كوتەرۋگە، بالالاردى ىنتالاندىرۋعا جانە مۇعالىمدەرگە قولايلى ورتا قالىپتاستىرۋعا باعىتتالعان جۇمىس، – دەدى الدەنەي.
“كەلەشەك مەكتەپتەرى” جوباسى اياسىندا 2023 جىلدان بەرى قاراعاندى، بالقاش جانە اۋدانداردا 7100 ورىنعا شاقتالعان 10 جاڭا مەكتەپتىڭ قۇرىلىسى ءجۇرىپ جاتىر. ونىڭ تورتەۋى (4400 ورىن) پايدالانۋعا بەرىلسە، قالعان التاۋى ءالى سالىنىپ جاتىر. بۇدان بولەك، قوسىمشا ءبىلىم بەرۋ ۇيىمدارى جەلىسىن كەڭەيتۋ جوسپاردا بار. مىسالى، مايقۇدىقتاعى وقۋشىلار سارايىنىڭ قۇرىلىسى اياقتالۋدا، سونداي-اق قارقارالى مەن قاراعاندىدا تاعى ەكى وقۋشىلار سارايى سالىنباق.
اكىم ورىنباسارىنىڭ ايتۋىنشا، مەملەكەتتىك-جەكەمەنشىك ارىپتەستىك اياسىندا دا بىرقاتار جوبالار جۇزەگە اسىرىلادى. وبلىس اكىمى ەرماعانبەت بولەكپاەۆ اۋىل بالالارىنا دا قولجەتىمدى ساپالى ءبىلىم بەرۋ ورتاسىن قۇرۋعا ەرەكشە كوڭىل ءبولىپ وتىر.
سونىمەن قاتار، ايماقتا وقۋ-اعارتۋ مينيسترلىگىنىڭ ء“بىلىم بەرۋدەگى وزگەرىستەردىڭ 1000 كوشباسشىسى” جوباسى ءجۇرىپ جاتىر. ول مەكتەپ باسشىلارىنىڭ جاڭا بۋىنىن قالىپتاستىرۋعا باعىتتالعان. ال “Ustaz Pro” جوباسى مۇعالىمدەردى كاسىبي دامىتۋعا، زاماناۋي ادىستەمەلەر مەن تسيفرلىق قۇرالداردى ەنگىزۋگە جانە ءبىلىم مەكەمەلەرىن اككرەديتتەۋگە جول اشادى.
بارلىق باستامانىڭ تۇپكى ماقساتى – بالالارعا ساپالى ءبىلىم، مۇعالىمدەرگە قولايلى جاعداي جاساۋ جانە ءوڭىردىڭ ءبىلىم بەرۋ جۇيەسىن جاڭا دەڭگەيگە كوتەرۋ، – دەپ دەپ ايتتى الىبەك الدەنەي.
