بۇل جونىندە شىمكەنت قالاسىنىڭ قورعانىس ىستەرى جونىندەگى دەپارتامەنتىنىڭ باستىعى پولكوۆنيك الماز تىلەۋحانوۆ ايتتى.
ول «شىمكەنت قالاسى بويىنشا قازاقستان رەسپۋبليكاسىنىڭ قارۋلى كۇشتەرىنە، باسقا دا اسكەرلەرى مەن اسكەري قۇرالىمدارىنا ازاماتتاردى مەرزىمدى اسكەري قىزمەتكە شاقىرۋدى ۇيىمداستىرۋ جانە جۇرگىزۋ» تاقىرىبىندا جاساعان بايانداماسىندا 2019 جىلدان بەرى اسكەرگە شاقىرۋشىلار سانى 40 پايىزعا ارتقانىن جەتكىزدى.
قازاقستان رەسپۋبليكاسى قارۋلى كۇشتەرى باس شتابى ۇيىمداستىرۋ-جۇمىلدىرۋ جۇمىستارى دەپارتامەنتى باستىعىنىڭ ورىنباسارى پولكوۆنيك رۋستام اقباروۆتىڭ جەتەكشىلىگىمەن شىمكەنت قالاسىنداعى جەرگىلىكتى اسكەري باسقارۋ ورگاندارىنىڭ باسشىلىق قۇرامىنا «كۇزگى اسكەرگە شاقىرۋ ناۋقانىن ۇيىمداستىرۋ مەن وتكىزۋ» تاقىرىبىندا وقۋ-ادىستەمەلىك جيىن ءوتتى.
جيىنعا قالا اكىمىنىڭ ورىنباسارى – قالالىق شاقىرۋ كوميسسياسىنىڭ توراعاسى شىڭعىس مۇقان، شىمكەنت گارنيزونىنىڭ اسكەري پروكۋرورى ادىلەت پولكوۆنيگى باعلان تەلەۋ جانە باسقا دا اسكەرگە شاقىرۋ جۇمىستارىن ۇيىمداستىرۋعا جاۋاپتى تۇلعالار قاتىستى.
جيىن بارىسىندا شىمكەنت قالاسىنىڭ قورعانىس ىستەرى جونىندەگى دەپارتامەنتىنىڭ باستىعى پولكوۆنيك الماز تىلەۋحانوۆ كوكتەمگى اسكەرگە شاقىرۋ كەزەڭىنىڭ قورىتىندىسىن شىعارىپ، كۇزگى ناۋقانعا ارنالعان جۇمىستار مەن جوسپارلارى تۋرالى باياندادى.
قورعانىس دەپارتامەنتى باستىعىنىڭ ايتۋىنشا، ازاماتتاردى مەرزىمدى اسكەري قىزمەتكە شاقىرۋ جوسپارى 2021 جىلمەن سالىستىرعاندا 72 ادامعا ارتقان.
– شىمكەنت قالاسىنىڭ قورعانىس ىستەرى جونىندەگى دەپارتامەنتى 2019 جىلى قۇرىلعان ساتتە ازاماتتاردى مەرزىمدى اسكەري قىزمەتكە شاقىرۋ جوسپارى 1 جىلعا 1200 جۋىق بالانى قۇرايتىن، ال قازىرگى تاڭدا 2022 جىلعى كوكتەم-كۇز اسكەرگە شاقىرۋ جوسپارى 1600 جۋىق ازاماتتى قامتيدى. قالادان كوكتەمگى شاقىرۋعا بەرىلگەن تاپسىرىس ارتىعىمەن – 103%-عا ورىندالدى. اتاپ ايتساق، قارۋلى كۇشتەر قاتارىنا 16 ادام، ۇلتتىق ۇلانعا 9 ادام بەرىلگەن تاپسىرىستان ارتىق جىبەرىلدى. كۇزگى اسكەرگە شاقىرۋ جوسپارىنا سايكەس، قالادان بارلىعى 800-گە جۋىق ادام شاقىرىلماق. بۇل جوسپاردى ساپالى ورىنداۋ ءۇشىن 6 مىڭنان استام ازاماتتى زەردەلەۋ كەرەك. بۇگىندە قالا بويىنشا 3 مىڭنان استام ازامات زەردەلەنىپ، ونىڭ 300-گە جۋىعى ىرىكتەلىپ، جەكە ىستەرى تولىقتىرىلۋدا، – دەدى پولكوۆنيك الماز تىلەۋحانوۆ.
سونداي-اق، جيىن بارىسىندا پرەزيدەنت جولداۋى دا تالقىلاندى. قورعانىس مينيسترلىگىنەن كەلگەن وفيتسەرلەر قۇرامى «سىبايلاس جەمقورلىققا قارسى كۇرەس» تۋرالى تارماققا ناقتىراق توكتالدى. بۇل جولدا شىمكەنت گارنيزونى اسكەري پوليتسيا ءبولىمىنىڭ اعا وفيتسەرى كاپيتان ەربول ايتباەۆ پەن قر سىبايلاس جەمقورلىققا قارسى ءىس-قيمىل اگەنتتىگى شىمكەنت قالاسى بويىنشا دەپارتامەنتىنىڭ وكىلى جازيرا ءالجانوۆا سىبايلاس جەمقورلىقتى تۋدىراتىن سەبەپتەر مەن جاعدايلاردى جويۋ تۋرالى نەگىزگى باعىتتارعا توقتالىپ، جەمقورلىققا قارسى كۇرەس كەشەندى نەگىزدە، ياعني مەملەكەتتىك ورگاندار مەن ازاماتتاردىڭ تىعىز قارىم-قاتىناسىندا جۇزەگە اسىرىلۋى كەرەك ەكەنىن اتاپ ءوتتى.
