قوس ازاماتتىعى بار رەسەيلىك ەرلى-زايىپتى قازاقستاننان شىعارىلدى. بۇل تۋرالى كولىكتەگى پوليتسيا دەپارتامەنتى مالىمدەدى، دەپ حابارلايدى “ادىرنا” ۇلتتىق پورتالى.
وقيعا الماتى حالىقارالىق اۋەجايىندا بولعان. قۇزىرلى ورگان قىزمەتكەرلەرى رەسەيدەن كەلگەن 71 جانە 69 جاستاعى ەرلى-زايىپتىنىڭ قوس ازاماتتىعى بارىن انىقتادى. ولاردىڭ ۇستىنەن اكىمشىلىك قۇقىق بۇزۋشىلىق تۋرالى كودەكستىڭ 496-بابى 2-بولىگى («شەتەل ازاماتتىعىن الۋ فاكتىسىن حابارلاماۋ») بويىنشا اكىمشىلىك حاتتاما تولتىرىلدى.
“الماتى قالاسىنىڭ اكىمشىلىك قۇقىق بۇزۋشىلىقتار جونىندەگى مامانداندىرىلعان اۋدانارالىق سوتىنىڭ قاۋلىسىمەن زاڭدى بۇزعان ەرلى-زايىپتى ەلدەن شىعارىلىپ، 5 جىل قازاقستانعا كىرۋ قۇقىعىنان ايىرىلدى”، - دەدى كولىكتەگى پد باسشىسىنىڭ ءبىرىنشى ورىنباسارى، پولكوۆنيك ماديار ايتۋعانوۆ.
ايتا كەتەيىك، جىل باسىنان بەرى كوشى-قون زاڭناماسىن بۇزعانى ءۇشىن 986 ادام جاۋاپكەرشىلىككە تارتىلدى. ونىڭ ىشىندە 38 ادامنىڭ قوس ازاماتتىعى بارى انىقتالعان. سونداي-اق سوت قاۋلىسىمەن 155 شەتەلدىك ەلدەن شىعارىلدى.
