تۇركىستان وبلىسىندا 100-دەن استام ادام استان ۋلانىپ قالدى. بۇل تۋرالى تۇركىستان وبلىستىق قوعامدىق دەنساۋلىق باسقارماسى باسشىسىنىڭ ورىنباسارى التىن دوسانوۆا ايتتى، دەپ حابارلايدى “ادىرنا” ۇلتتىق پورتالى.
ولار 6-9 قازان ارالىعىندا كەنتاۋ قالاسىنداعى قوعامدىق تاماقتاندىرۋ ورىندارىنىڭ بىرىنەن تاپسىرىسپەن سۋشي، پيتستسا، فري جانە چيكەن العان.
التىن دوسانوۆانىڭ ايتۋىنشا، استان ۋلانعانىنا شاعىمدانعان جالپى 145 ادام كەلىپ تىركەلگەن. ونىڭ 98-ءى اۋرۋحاناعا جاتقىزىلعان. ياعني تۇركىستان قالاسىنداعى اۋرۋحاناعا 31 ناۋقاس، كەنتاۋ قالاسىنداعى اۋرۋحاناعا 67 ناۋقاس جاتقىزىلعان. ناۋقاستاردىڭ اراسىندا 5 جۇكتى ايەل مەن 33 بالا بار. ءبارىنىڭ جاعدايى بۇگىنگى تاڭدا ورتاشا اۋىر. سونداي-اق 47 ناۋقاس امبۋلاتورلىق دەڭگەيدە تەكسەرىلۋگە جىبەرىلگەن. باسىلىمنىڭ جازۋىنشا، ينفەكتسيانىڭ ناقتى قانداي تاعامنان تاراعانى ازىرگە بەلگىسىز. بارلىق تاعامنان زەرتحانالىق سىنامالار الىنعان. بۇل جايتتان كەيىن قوعامدىق تاماقتانۋ ورنى ۋاقىتشا جابىلعان. پوليتسيا اتالمىش فاكتى بويىنشا قىلمىستىق ءىس قوزعاپ، سوتقا دەيىنگى تەرگەپ-تەكسەرۋ امالدارىن باستاعان.
سونداي-اق، كەنتاۋ قالاسىنىڭ سانيتارلىق-ەپيدەميولوگيالىق باقىلاۋ باسقارماسى مەن پوليتسيا ءبولىمى اتالعان نىسانعا جوسپاردان تىس تەكسەرىس جۇرگىزگەن. ناتيجەسىندە كاسىپكەردىڭ قاجەتتى سانيتارلىق قۇجاتتارى مەن اسپازداردىڭ مەديتسينالىق تەكسەرۋدەن وتكەنى تۋرالى انىقتامالارى جوق بولىپ شىققان.
