الماتىدا 12–14 قازان ارالىعىندا جەدەل ىشەك ينفەكتسياسىنىڭ بەلگىلەرىمەن رەسپۋبليكالىق فيزيكا-ماتەماتيكا مەكتەبىنىڭ 48 وقۋشىسى قالالىق بالالار كلينيكالىق ينفەكتسيالىق اۋرۋحاناسىنا جاتقىزىلدى. بۇل تۋرالى قالالىق قوعامدىق دەنساۋلىق ساقتاۋ باسقارماسى جازدى، دەپ حابارلايدى «ادىرنا» ءتىلشىسى.
تاعى 6 بالا ينتەرناتتا وقشاۋلانىپ، دارىگەرلەردىڭ باقىلاۋىندا ەكەنى ايتىلدى.
«بارلىق بالاعا قاجەتتى مەديتسينالىق كومەك تولىق كولەمدە كورسەتىلىپ جاتىر. ولاردى ەمدەۋگە قاجەت جاعداي جاسالعان. ناۋقاستار مەديتسينا ماماندارىنىڭ تۇراقتى باقىلاۋىندا»، – دەلىنگەن حابارلامادا.
باسقارمانىڭ مالىمەتىنشە، بالالاردىڭ جاعدايى تۇراقتى. ولاردىڭ ەشقايسىسى جانساقتاۋ كومەگىنە مۇقتاج ەمەس.
باستاپقىدا اۋرۋحاناعا جاتقىزىلعان وقۋشىلار سانى 47 دەپ حابارلانعان ەدى. وقيعاعا بايلانىستى مەكتەپتىڭ، ينتەرناتتىڭ جانە اسحانانىڭ جۇمىسى ۋاقىتشا توقتاتىلدى.
