باتىر، قولباسشى سىرىم داتۇلىنىڭ تۋعانىنا 280 جىل جانە كورنەكتى مەملەكەت، ۇلت قايراتكەرى، الاش زيالىسى جاھانشا دوسمۇحامەدۇلىنىڭ تۋعانىنا 135 جىل تولۋىنا وراي سىرىم ەلىندە ءدۇبىرلى توي اپتا بويى تولاستامادى. كۇللى الاشقا ورتاق تويعا الىستان ات ارىلتىپ كەلگەن قوناقتاردى اۋدان اكىمى تولەگەن تورەعاليەۆ باستاعان ەل ازاماتتارى كۇتىپ الدى. مەيماندار الدىمەن باتىردىڭ ەسكەرتكىشىنە گۇل شوقتارىن قويىپ، «سىرىم شىققان توبەگە» تاعزىم ەتتى.
بۇدان ءارى ۇلان اسىر توي الامان ايتىسقا، ءدۇبىرلى بايگە مەن تازى جارىسىنا ۇلاستى.
دالاداعى ءدۇبىرلى دوداعا جينالعاندار اۋەلى قۇماي تازىلار جارىسىن تاماشالادى. ءار اۋداننان قوسىلعان تازىلار ءاپ دەگەندە سۋىرىلا العا شىققاندارىمەن، بايتەرەك اۋدانىنان كەلگەن مارات مۇحتاروۆتىڭ تازىسى 1 ورىندى يەلەنسە (50 000 ت ) 2- 3 ورىندى نۇرلان مۇحتاروۆتىڭ تازىسى (30 000 - 20 000 تگ) الدى. نۇرلان ماراتۇلى بايتەرەك اۋدانىنا قاراستى ترەكين اۋىلىنىڭ تۇرعىنى. ونىڭ قۇماي تازىلاردى باپتاۋمەن اينالىسقانىنا بەس جىلدان اسقان. اتادان مۇرا كاسىپتى جالعاعان ول ءبىرىنشى ورىندى اكەسى باپتاعان تازىنىڭ بەرمەيتىنىنە سەنىمدى بولعانىن ايتادى. بويىنداعى جەتى قازىنانىڭ ءبىرى سانالاتىن قازاقى تازىلارعا دەگەن قىزىعۋشىلىعى ەرەكشە ەكەنىن جاسىرمادى. قازىر 5 قۇماي تازىسى بار. وسى دودادا دا مۇحتاروۆتاردىڭ تازىلارى العاشقى ءۇش ورىندى دا ەشكىمگە بەرمەدى.
بۇدان سوڭ كەڭ دالانى دۇبىرلەتكەن،باپكەرلەردى تولقىتقان 2 اينالىمدىق «تاي جارىسى» باستالىپ، سوڭى 6 اينالىمدىق «توپ بايگە» جانە 8 اينالىمدىق «الامان بايگەگە» ۇلاستى. ءۇش ءتۇرلى بايگەنىڭ ناتيجەسىندە «تاي جارىسىندا» 1 ورىندى اسىلبەك جاڭاباەۆتىڭ «قاراتورعايى» (اقجايىق اۋدانى، 250 000 تەڭگە) يەلەنسە ، ەكىنشى ورىن قالدىبەك نۇرپەيىسوۆتىڭ «تۇمارىنا» (اقتوبە وبلىسى، قوبدا اۋدانى، 150 000 تەڭگە) بۇيىردى. ءۇشىنشى ورىندى مەيرامبەك ۋميروۆتىڭ «سامالى» (قوبدا اۋدانى، 100 000 تەڭگە) ەنشىلەدى. «توپ بايگەدە» تەمىر كاكىم باپتاعان «تاسقىن» (تەرەكتى اۋدانى، 800 000 تەڭگە), «الامان بايگەدە» بەكبول بايجارقىنوۆتىڭ «مەسيسى» (اقتوبە وبلىسى، 1 000 000 تەڭگە) ەشكىمدى شاڭىنا ەرتپەدى.
ال ايتىستىڭ اتاسى، حالىقارالىق ايتىس اقىندارى مەن جىرشى-تەرمەشىلەر وداعىنىڭ توراعاسى ءجۇرسىن ەرمان تىزگىندەگەن «سىرىم – ايبارىم، جاھانشا – بايراعىم» اتتى رەسپۋبليكالىق اقىندار ايتىسىنا ءتول ونەرگە سۋسىنداعىن حالىق كوپ جيىلدى.
جىر دوداسىندا سىرىمدىق باۋىرجان شيرمەدينۇلى مەن تالعات مىقي، اتىراۋلىق شالقارباي ءىزباساروۆ پەن مۇرادىم ميرلانوۆ، بەكارىس شويبەكوۆ پەن ءۇش مارتە «التىن دومبىرا» يەگەرى مۇحتار نيازوۆ، سىر سۇلەيلەرىنىڭ سىنىعى نۇرمات مانسۇروۆ پەن نارىننىڭ نار قىزى جانسايا مۋسينا ءسوز قاعىستىرىپ، ءۇش ساعاتقا جۋىق حالىقتى ۇلتتىق ونەرمەن سۋسىنداتتى. اۋدان اكىمى تولەگەن تورەعاليەۆ سەگىز اقىننىڭ ارقايسىسىنا ەلدىڭ اتىنان ات مىنگىزىپ، جۇيرىكتەردى باپتاعان ءجۇرسىن ەرمانعا شاپان جاۋىپ، قۇرمەت كورسەتسە، وبلىستىق ءماسليحات دەپۋتاتى، «جىبەك جولى» شارۋا قوجالىعىنىڭ جەتەكشىسى عانيمات نۇرمۇحانوۆ ءجۇرسىن مولداشۇلىنا ات مىنگىزدى.
ءجۇرسىننىڭ جۇيرىكتەرى قاتىسقان الامان ايتىستان سوڭى گالا كونتسەرتكە جالعاستى. وڭىرىمىزگە تانىمال ونەر يەلەرى قازاقستان كومپوزيتورلار وداعىنىڭ مۇشەسى، ءانشى-سازگەر جاسكەلەڭ عايساعاليەۆ، تاراس جاۋىنباەۆ، كاميلا شايحيەۆا، قانات تولەپقالي، دانابەك ۇمبەتالىلەر سىرىمنىڭ اسپانىندا سىرلى اندەرىن قالىقتاتتى. قازىرگى تاڭدا تىڭدارماندارىنىڭ جۇرەگىن جاۋلاعان جاستاردىڭ سۇيىكتى ءانشىسى سادراددين بولات كەشتىڭ شىرايىن كىرگىزدى.
