Syrymdaǵy dúbirli toı

1654
Adyrna.kz Telegram

Batyr, qolbasshy Syrym Datulynyń týǵanyna 280 jyl jáne kórnekti memleket, ult qaıratkeri, alash zııalysy Jahansha Dosmuhamedulynyń týǵanyna 135 jyl tolýyna oraı Syrym elinde dúbirli toı apta boıy tolastamady. Kúlli alashqa ortaq toıǵa alystan at aryltyp kelgen qonaqtardy aýdan ákimi Tólegen Tóreǵalıev bastaǵan el azamattary kútip aldy. Meımandar aldymen batyrdyń eskertkishine gúl shoqtaryn qoıyp, «Syrym shyqqan tóbege» taǵzym etti.

Budan ári ulan asyr toı alaman aıtysqa, dúbirli báıge men tazy jarysyna ulasty.
Daladaǵy dúbirli dodaǵa jınalǵandar áýeli qumaı tazylar jarysyn tamashalady. Ár aýdannan qosylǵan tazylar áp degende sýyryla alǵa shyqqandarymen, Báıterek aýdanynan kelgen Marat Muhtarovtyń tazysy 1 oryndy ıelense (50 000 t ) 2- 3 oryndy Nurlan Muhtarovtyń tazysy (30 000 - 20 000 tg) aldy. Nurlan Maratuly Báıterek aýdanyna qarasty Trekın aýylynyń turǵyny. Onyń qumaı tazylardy baptaýmen aınalysqanyna bes jyldan asqan. Atadan mura kásipti jalǵaǵan ol birinshi oryndy ákesi baptaǵan tazynyń bermeıtinine senimdi bolǵanyn aıtady. Boıyndaǵy jeti qazynanyń biri sanalatyn qazaqy tazylarǵa degen qyzyǵýshylyǵy erekshe ekenin jasyrmady. Qazir 5 qumaı tazysy bar. Osy dodada da Muhtarovtardyń tazylary alǵashqy úsh oryndy da eshkimge bermedi.

Budan soń keń dalany dúbirletken,bapkerlerdi tolqytqan 2 aınalymdyq «taı jarysy» bastalyp, sońy 6 aınalymdyq «top báıge» jáne 8 aınalymdyq «alaman báıgege» ulasty. Úsh túrli báıgeniń nátıjesinde «Taı jarysynda» 1 oryndy Asylbek Jańabaevtyń «Qaratorǵaıy» (Aqjaıyq aýdany, 250 000 teńge) ıelense , ekinshi oryn Qaldybek Nurpeıisovtyń «Tumaryna» (Aqtóbe oblysy, Qobda aýdany, 150 000 teńge) buıyrdy. Úshinshi oryndy Meırambek Ýmırovtyń «Samaly» (Qobda aýdany, 100 000 teńge) enshiledi. «Top báıgede» Temir Kákim baptaǵan «Tasqyn» (Terekti aýdany, 800 000 teńge), «Alaman báıgede» Bekbol Baıjarqynovtyń «Mesısi» (Aqtóbe oblysy, 1 000 000 teńge) eshkimdi shańyna ertpedi.
Al aıtystyń atasy, halyqaralyq aıtys aqyndary men jyrshy-termeshiler odaǵynyń tóraǵasy Júrsin Erman tizgindegen «Syrym – aıbarym, Jahansha – baıraǵym» atty respýblıkalyq aqyndar aıtysyna tól ónerge sýsyndaǵyn halyq kóp jıyldy.

Jyr dodasynda syrymdyq Baýyrjan Shırmedınuly men Talǵat Myqı, atyraýlyq Shalqarbaı Izbasarov pen Muradym Mırlanov, Bekarys Shoıbekov pen úsh márte «Altyn dombyra» ıegeri Muhtar Nııazov, Syr súleıleriniń synyǵy Nurmat Mansurov pen Narynnyń nar qyzy Jansaıa Mýsına sóz qaǵystyryp, úsh saǵatqa jýyq halyqty ulttyq ónermen sýsyndatty. Aýdan ákimi Tólegen Tóreǵalıev segiz aqynnyń árqaısysyna eldiń atynan at mingizip, júırikterdi baptaǵan Júrsin Ermanǵa shapan jaýyp, qurmet kórsetse, oblystyq máslıhat depýtaty, «Jibek joly» sharýa qojalyǵynyń jetekshisi Ǵanımat Nurmuhanov Júrsin Moldashulyna at mingizdi.


Júrsinniń júırikteri qatysqan alaman aıtystan sońy gala konertke jalǵasty. Óńirimizge tanymal óner ıeleri Qazaqstan Kompozıtorlar odaǵynyń múshesi, ánshi-sazger Jaskeleń Ǵaısaǵalıev, Taras Jaýynbaev, Kamıla Shaıhıeva, Qanat Tólepqalı, Danabek Úmbetáliler Syrymnyń aspanynda syrly ánderin qalyqtatty. Qazirgi tańda tyńdarmandarynyń júregin jaýlaǵan jastardyń súıikti ánshisi Sadraddın Bolat keshtiń shyraıyn kirgizdi.

Pikirler