دۇيسەنبىدە، 22-قازاندا الەۋمەتتىك جەلى قىزىل تۇسكە كومىلىپ قالدى. قازاقستاندىقتار كومسومولدىڭ 100-جىلدىعىنا قاتىستى سۋرەتتەردى جارىسا ءبولىستى. الدە قاشان ءولىپ قالعان ۇيىمنىڭ عاسىرلىق مەرەيتويىن كوممۋنيستەر مەن نۇروتاندىقتار 20-قازاندا الماتىداعى اباي اتىنداعى قازاق مەملەكەتتىك اكادەميالىق وپەرا جانە بالەت تەاترىندا دۇركىرەتىپ اتاپ ءوتتى . تاڭقالارلىعى كوممۋنيستەردىڭ وزدەرى قىرۋار قارجىنى تالاپ ەتەتىن بۇل شارانىڭ قالاي ۇيىمداستىرىلعانىن جاقسى بىلە بەرمەيدى ەكەن.
ءبىز قحكپ ورتالىق كوميتەتىنىڭ قۇرمەتتى حاتشىسى، ءماجىلىس دەپۋتاتى ۆلاديسلاۆ كوسارەۆكە حابارلاسىپ ەدىك، ول «كونتسەرت تاماشا ءوتتى» دەدى. قىزىلداردىڭ الدىندا قالاماقىلارى مىڭداعان دوللار تۇراتىن كاسىپقوي انشىلەر ءان شىرقاسا، كونتسەرت قالاي تاماشا وتپەسىن! الەۋمەتتىك جەلىدە ماسەلەن، روزا رىمباەۆانىڭ سۋرەتى جاريالاندى. ساحنا ءسانى دە وتە مىقتى. ارزانقول دۇنيەنىڭ جوقتىعى انىق كورىنەدى.
ۆلاديسلاۆ كوسارەۆ بىزگە بەرگەن سۇحباتىندا «انشىلەر تەگىن ءان سالۋى دا مۇمكىن، بولماسا، قالاماقى جاعىنان مادەنيەت جانە سپورت مينيسترلىگى كومەكتەسكەن بولۋى كەرەك» دەدى.
– ارتيستەر تەگىن ونەر كورسەتتى مە؟
– مەنىڭشە، سولاي. مۇمكىن مادەنيەت جانە سپورت مينيسترلىگى جاردەمدەستى. كونتسەرت وتە تاماشا ءوتتى،– دەدى كوسارەۆ.
كوممۋنيستەرگە نۇروتاندىقتار الماتىداعى قازاق مەملەكەتتىك اكادەميالىق وپەرا جانە بالەت تەاترىنىڭ زالىن جالعا الۋعا جاردەمدەسىپتى. ال، شىعىن جاعىن جابۋدى قالالىق اكىمدىك قولعا الىپتى.
– الماتى اكىمدىگى زالدىڭ جالعا الۋىن تولەدى. ءبىز (قاتىسۋشىلار- رەد.) 800 ادامنان كوپ بولدىق,– دەيدى ۆلاديسلاۆ كوسارەۆ.
ءدال وسى كەشكە الماتىعا استانادان ارنايىن ۇشىپ كەلگەندەردىڭ ىشىندە پارلامەنت دەپۋتاتتارى دا بولدى. ۆلاديسلاۆ كوسارەۆتىڭ سوزىنشە، كومپارتيا ولاردىڭ جول شىعىنىن تولەمەگەن. ال رەسەيدەگى قازاقستاننىڭ ەلشىسى يمانعالي تاسماعامبەتوۆتىڭ حالىقارالىق جول شىعىنىن كىم وتەگەنىن كوممۋنيست اشىپ ايتپادى.
– ونىڭ جيناعان اقشاسى بار شىعار. بولماسا «كومانديروۆكامەن» ۇشىپ كەلدى. ول جاعىن ناقتى ايتا المايمىن, –دەدى كوسارەۆ.
كوساەرۆتىڭ سوزىنشە وسى اپتادا قازاقستاننىڭ بارلىق بارلىق ايماقتارىندا جانە استانادا قحكپ جاستار قاناتى سلەتتار وتكىزبەك.
انار ارىستانبەك
"جاس الاش"
