Dúısenbide, 22-qazanda áleýmettik jeli qyzyl túske kómilip qaldy. Qazaqstandyqtar komsomoldyń 100-jyldyǵyna qatysty sýretterdi jarysa bólisti. Álde qashan ólip qalǵan uıymnyń ǵasyrlyq mereıtoıyn kommýnıster men nurotandyqtar 20-qazanda Almatydaǵy Abaı atyndaǵy Qazaq memlekettik akademııalyq opera jáne balet teatrynda dúrkiretip atap ótti . Tańqalarlyǵy kommýnısterdiń ózderi qyrýar qarjyny talap etetin bul sharanyń qalaı uıymdastyrylǵanyn jaqsy bile bermeıdi eken.
Biz QHKP ortalyq komıtetiniń qurmetti hatshysy, májilis depýtaty Vladıslav KOSAREVKE habarlasyp edik, ol «konert tamasha ótti» dedi. Qyzyldardyń aldynda qalamaqylary myńdaǵan dollar turatyn kásipqoı ánshiler án shyrqasa, konert qalaı tamasha ótpesin! Áleýmettik jelide máselen, Roza Rymbaevanyń sýreti jarııalandy. Sahna sáni de óte myqty. Arzanqol dúnıeniń joqtyǵy anyq kórinedi.
Vladıslav KOSAREV bizge bergen suhbatynda «ánshiler tegin án salýy da múmkin, bolmasa, qalamaqy jaǵynan mádenıet jáne sport mınıstrligi kómektesken bolýy kerek» dedi.
– Artıster tegin óner kórsetti me?
– Menińshe, solaı. Múmkin Mádenıet jáne sport mınıstrligi járdemdesti. Konert óte tamasha ótti,– dedi Kosarev.
Kommýnısterge nurotandyqtar Almatydaǵy qazaq memlekettik akademııalyq opera jáne balet teatrynyń zalyn jalǵa alýǵa járdemdesipti. Al, shyǵyn jaǵyn jabýdy qalalyq ákimdik qolǵa alypty.
– Almaty ákimdigi zaldyń jalǵa alýyn tóledi. Biz (qatysýshylar- red.) 800 adamnan kóp boldyq,– deıdi Vladıslav Kosarev.
Dál osy keshke Almatyǵa Astanadan arnaıyn ushyp kelgenderdiń ishinde parlament depýtattary da boldy. Vladıslav Kosarevtiń sózinshe, kompartııa olardyń jol shyǵynyn tólemegen. Al Reseıdegi Qazaqstannyń elshisi Imanǵalı Tasmaǵambetovtyń halyqaralyq jol shyǵynyn kim ótegenin kommýnıst ashyp aıtpady.
– Onyń jınaǵan aqshasy bar shyǵar. Bolmasa «komandırovkamen» ushyp keldi. Ol jaǵyn naqty aıta almaımyn, –dedi Kosarev.
Kosaervtiń sózinshe osy aptada Qazaqstannyń barlyq barlyq aımaqtarynda jáne Astanada QHKP jastar qanaty slettar ótkizbek.
Anar Arystanbek
"Jas Alash"
