نيۋ-يوركتە وتكەن جۇگىرۋ مارافونىندا 80-89 جاس ساناتىندا قازاقستاندىق سالتانات تۇيتەباەۆ چەمپيون اتاندى، دەپ حابارلايدى «ادىرنا» ءتىلشىسى.
«الەمدە ەڭ بەدەلدى سانالاتىن 6 مارافون بار. ولار لوندون، بوستون، بەرلين، چيكاگو، نيۋ-يورك جانە توكيو قالالارىندا وتەدى. بۇل باسەكەگە تەك جارنا تولەپ قانا قاتىسا المايسىڭ. ارنايى ۋاقىت ءنورماتيۆىن ورىنداۋىڭ ءتيىس. مەن امستەردامداعى تراسسادا بەلگىلى ءبىر ۋاقىت كورسەتكىشىن تىركەپ، نيۋ-يورك مارافونىنا قاتىسۋعا ءوتىنىش جىبەرگەنمىن. بيىل 200 مىڭ ۇمىتكەر اراسىنان شاقىرتۋ الدىم. ءوز كارەرامدا ەكىنشى مارتە نيۋ-يورك مارافونىندا جۇگىرۋ باقىتى بۇيىردى»، – دەيدى سالتانات تۇيتەباەۆ.
80 جاستاعى قاريا 2021 جىلى دا نيۋ-يورك مارافونىنا قاتىسىپ، 75-79 جاس ساناتىندا كۇمىس جۇلدە العان ەدى. ەندى ول اراعا 4 جىل سالىپ 42,2 شاقىرىمدى 4 ساعات 45 مينۋت 56 سەكۋندتا جۇگىرىپ وتكەن. وسى ناتيجەنىڭ ارقاسىندا قاريا 80-89 جاس ساناتىندا توپ جاردى.
«2021 جىلى الەمدە پاندەميا بولعانىقتان، نيۋ-يورك مارافونىنا 30 مىڭداي ادامعا قاتىسۋعا رۇقسات بەرىلىپ ەدى. وسى جولى 55 مىڭ ادام ءبىر مەزەتتە جۇگىردى. وليمپيادا جانە الەم چەمپيوندارىمەن، رەكوردسمەندەرمەن بىرگە جۇگىرۋ – ۇلكەن مارتەبە. تراسسا وتە اۋىر بولسا دا، جول بويى 2 ملن-نان استام جانكۇيەر قىزۋ قولدادى»، – دەيدى ول.
5 قاراشاعا قاراعان ءتۇنى جۇگىرۋدى كۇندەلىكتى ادەتىنە اينالدىرعان سالتانات تۇيتەباەۆتى اۋەجايدان استانا قالاسىنىڭ دەنە شىنىقتىرۋ جانە سپورت باسقارماسى باسشىسىنىڭ ورىنباسارى ازامات اعزاموۆ، تۋعان-تۋىستارى قۇشاق جايا قارسى الدى.
ايتا كەتەيىك، بيىل نيۋ-يورك مارافونىندا قازاقستان اتىنان 44 سپورتشى قاتىسقان. ال New York Marathon جۇگىرىسىندە ەڭ ەگدە قاتىسۋشى بولىپ جاپونيادان بارعان كويچي كيتاباتاكە تانىلدى. 91 جاستاعى قاتىسۋشى مارافون قاشىقتىعىن 7 ساعات 25 مينۋت 13 سەكۋندتا ەڭسەرگەن.
