Qazaqstannyń dalasyn jaıaý aralap shyqqan 72 jastaǵy jıhangez Sársenbaı Qotyrashev óz saparyn aıaqtady. Aqsaqal naýryz aıynda jolǵa shyǵyp, 8 myń shaqyrymǵa jýyq joldy jaıaý júrip ótken, dep habarlaıdy "Adyrna" ulttyq portaly.
Sársenbaı aqsaqaldyń sátti sapary Ulytaý topyraǵynan bastalypty. Júris-turysy shıraq, tyń qarııany elorda áýejaıynda bir top kisi kútip alyp, qurmet kórsetti.
"Jaıaý júrip ótken jol saparymdy Aqtaýda aıaqtadym. Elimizdiń barlyq óńirinde boldym. Jospar oryndaldy. Dittegen maqsatyma jettik. Maqsatym — Qazaqstanymdy jaıaý aralap shyǵý edi. Endi tutas dúnıege sapar sheksem be dep otyrmyn. Keler jyly jazda jolǵa attanamyn", - dedi aqsaqal.
"Asyń barda er tany berip júrip, Atyń barda jer tany jelip júrip" degen babalar sózin ǵumyrlyq muratyna aınaldyrǵan marafonshy aqsaqal keleshekte Ázirbaıjan, aldyńǵy Azııa men Eýropaǵa taban tirep, ári AQSh, Qytaı, Mońǵolııany jaıaý kezýdi josparlap otyr.
Sonymen qatar, kópti kórgen qarııa at shyǵaryp, ataq qýý esh muraty emes, muraty - el-jurtyn tegis taný ekendigin de erekshe atap ótti.
"Adyrna" ulttyq portaly
