باتىس قازاقستان وبلىسىنا جۇمىس ساپارى اياسىندا قازاقستان رەسپۋبليكاسى كاسىپوداقتار فەدەراتسياسىنىڭ توراعاسى ساتىبالدى داۋلەتالين وبلىس اكىمى عالي ەسقاليەۆپەن كەزدەستى. الەۋمەتتىك ارىپتەستەر الەۋمەتتىك-ەڭبەك قاتىناستارىن دامىتۋ بويىنشا وڭىردە قابىلدانىپ جاتقان شارالاردى تالقىلادى.
قر كاسىپوداقتار فەدەراتسياسىنىڭ باسشىسى ساتىبالدى داۋلەتالين مەن باتىس قازاقستان وبلىسى اكىمىنىڭ ءبىرىنشى ورىنباسارى ارمان وتەعۇلوۆتىڭ توراعالىعىمەن وتكەن الەۋمەتتىك ارىپتەستىك جانە الەۋمەتتىك-ەڭبەك قاتىناستارىن رەتتەۋ جونىندەگى وڭىرلىك ۇشجاقتى كوميسسيانىڭ وتىرىسى وزەكتى تاقىرىپتاردى قاۋزادى.
الەۋمەتتىك ارىپتەستەردى تالقىلاۋدىڭ باستى تاقىرىبى الەۋمەتتىك ارىپتەستىك جانە جالپى الەۋمەتتىك-ەڭبەك قاتىناستارىن دامىتۋ جونىندەگى وڭىرلىك كەلىسىمدى ىسكە اسىرۋ بويىنشا جەرگىلىكتى اتقارۋشى ورگانداردىڭ، كاسىپوداقتار مەن جۇمىس بەرۋشىلەردىڭ بىرلەسكەن جۇمىسىنىڭ كورسەتكىشتەرى بولدى.
باتىس قازاقستان وبلىسى اكىمدىگىنىڭ مەملەكەتتىك ەڭبەك ينسپەكتسياسى باسقارماسىنىڭ باسشىسى اسىلۇلان دوسجانوۆتىڭ مالىمەتىنشە، جىل باسىنان بەرى 77 كاسىپورىننىڭ قىزمەتىنە تەكسەرۋ جۇرگىزىلىپ، 149 بۇزۋشىلىق انىقتالدى، ولاردىڭ باسىم بولىگى الەۋمەتتىك-ەڭبەك قاتىناستارىنا قاتىستى.
جۇمىس بەرۋشىلەرگە قاتىستى 76 نۇسقاما بەرىلىپ، 32 كاسىپورىنعا ايىپپۇل سالىندى.
اكىمدىك وكىلى ءوڭىر كاسىپورىندارىندا ەڭبەك جانجالدارىنىڭ بولماۋىن كاسىپوداقتارمەن بىرلەسكەن جۇمىستاردىڭ وڭ ناتيجەسى دەپ اتادى.
سونىمەن قاتار، باتىس قازاقستان وبلىسىندا 10 سالالىق كاسىپوداق جانە 14 جەرگىلىكتى كاسىپوداق جۇمىس ىستەيدى، ولاردىڭ قۇرامىندا 72 مىڭ كاسىپوداق مۇشەسى بار مىڭنان استام باستاۋىش كاسىپوداق ۇيىمدارى بار. 2022 جىلدىڭ 9 ايىندا 10 جاڭا كاسىپوداق ۇيىمى قۇرىلدى، 1700-دەن استام ادام كاسىپوداق مۇشەسى بولدى.
باتىس قازاقستان وبلىسى كاسىپوداقتارىنىڭ اۋماقتىق بىرلەستىگىنىڭ ءتورايىمى ايگۇل ەسەكەنوۆانىڭ ايتۋىنشا، الەۋمەتتىك ارىپتەستەردىڭ باستى جەتىستىكتەرىنىڭ ءبىرى وڭىرلىك كەلىسىمگە وبلىس كاسىپورىندارى قىزمەتكەرلەرىنىڭ جالاقىسىن ينفلياتسيا دەڭگەيىنە يندەكستەۋ جونىندەگى نورمالاردى جانە كاسىپورىنداردىڭ تەحنيكالىق ينسپەكتورلارىن ماتەريالدىق ىنتالاندىرۋ جونىندەگى شارالاردى ەنگىزۋ بولدى.
الايدا كاسىبي ورتالىقتىڭ ستاتيستيكاسىنا سايكەس، بيىل ءوڭىر كاسىپورىندارىندا 64 جازاتايىم وقيعا ورىن الىپ، 47 ادام زارداپ شەكتى، ونىڭ 12-ءسى قايتىس بولدى.
وسىعان بايلانىستى قر كاسىپوداقتار فەدەراتسياسىنىڭ توراعاسى ساتىبالدى داۋلەتالين الەۋمەتتىك ارىپتەستىك تاراپتارىنا «حالىقتىق باقىلاۋ» باعدارلاماسىن ەنگىزە وتىرىپ، «Vizionzero» ستاندارتتارىنا قوسىلۋ ارقىلى جانە «ASPANS» ەڭبەك قاۋىپسىزدىگىن قامتاماسىز ەتۋ بويىنشا وتاندىق تسيفرلىق پلاتفورمانى قولدانۋ ارقىلى وندىرىستىك جاراقاتتانۋ جاعدايلارىنا جول بەرمەۋ شارالارىن كۇشەيتۋدى ۇسىندى.
