بقو وڭىرلىك كوممۋنيكاتسيالار قىزمەتىندەگى بريفينگتە بقو اكىمىنىڭ ورىنباسارى باقىتجان نارىمبەتوۆ، بقو پوليتسيا دەپارتامەنتى باستىعىنىڭ ءبىرىنشى ورىنباسارى، پوليتسيا پولكوۆنيگى جانبولات جانشين جانە «ازاماتتارعا ارنالعان ۇكىمەت» مەملەكەتتىك كورپوراتسياسى كەاق بقو بويىنشا فيليالىنىڭ ديرەكتورى نادير قۇرىمباەۆ رەسەي ازاماتتارىنىڭ كوشى-قون پروتسەسىنە قاتىستى تۋىنداعان ماسەلەلەردى تۇيىندەدى.
الاڭداۋعا نەگىز جوق
بقو اكىمىنىڭ ورىنباسارى باقىتجان نارىمبەتوۆتىڭ مالىمەتىنشە، رەسەي فەدەراتسياسى مەن قازاقستان شەكاراسى اۋماعىندا بولىپ جاتقان احۋال تولىق باقىلاۋدا. بارلىق كۇشتىك قۇرىلىمدار مەن مەملەكەتتىك ورگاندار ءوڭىر تۇرعىندارىنىڭ قاۋىپسىزدىگىن قامتاماسىز ەتۋ ءۇشىن قىزمەت ەتۋدە. قازىرگى تاڭدا رەسەي فەدەراتسياسىنان قازاقستانعا وتەتىن شەكارا پۋنكتتەرىندە تاۋلىكتىك پاترۋلدەۋ جۇرگىزىلىپ وتىر.
– سىرىم، شاعان، تاسقالا، تەپلىي شەكارا پوستتارىندا تاۋلىك بويى ۇزدىكسىز پوليتسيا دەپارتامەنتى قىزمەتكەرلەرىجۇمىس ىستەۋدە. ورال قالاسى بويىنشا پاترۋلدىك پوليتسيا مەن جاياۋ ناريادتار كوبەيتىلىپ، بارلىق قوعامدىق جەرلەر باقىلانۋدا. ودان بولەك ەرىكتىلەردەن قۇرىلعان 5 توپ وبلىس ورتالىعىنداعى الاڭ، پاركتەرگە باقىلاۋ جاساپ، مونيتورينگ جۇرگىزۋدە. وبلىستاعى ەرىكتىلەر رف كەلگەن ازاماتتارعا جينالۋ ورىندارى مەن كومەك كورسەتۋ ورىندارىن بەلگىلەپ، قول ۇشىن بەرىپ جاتىر، – دەدى باقىتجان قابەرۇلى.
اكىم ورىنباسارىنىڭ سوزىنشە، تاسىمالداۋشىلارمەن شەكارادان وبلىس ورتالىعىنا دەيىن جانە ودان ءارى جەتكىزۋ ورىندارىنا دەيىن ءبىر ادامنان 700 رۋبلدەن تاسىمالداۋ جۇرگىزىلۋدە.وبلىس ەرىكتىلەرىنىڭ باستاماسىمەن اتامەكەن» جانە «سامال» جازعى لاگەرلەرىنىڭ بازاسىندا 330 ورىنعا «كەلۋشىلەردى اقىلى تۇردە قابىلداۋ پۋنكتتەرى» ۇيىمداستىرىلعان. وندا ۋاقىتشا تۇرۋ جانە تاماقتانۋ قىزمەتتەرى 5000 تەڭگەنى قۇرايدى. رف كەلگەن ازاماتتارعا جانە ءبىزدىڭ تۇرعىندار ءۇشىن تۇيتكىلدى ماسەلەلەردى شەشۋ ماقساتىندا 109 بىرىڭعاي call-ورتالىعىنا حابارلاسۋعا بولادى. سونىمەن بىرگە الەۋمەتتىك جەلىلەردە ەلىمىزدىڭ باسقا وڭىرلەرىنە جۇرەتىن تۇراقتى اۆتوبۋس مارشرۋتتارىنىڭ قوزعالىس كەستەسى، جولاقى قۇنى تۋرالى اقپاراتتار ورنالاستىرىلعان. قالىپتاسقان جاعدايعا وراي كۇنىنە 3 رەت جولاۋشىلار اۆتوبۋسى اتىراۋ قالاسىنا قاتىناۋدا. پوەزد باعىتتارىنا قوسىمشا ۆاگوندار تىركەۋ، اۋە رەيستەرىن كوبەيتۋ جونىندە سۇرانىستار بويىنشا ءتيىستى مينيسترلىك پەن «قازاقستان تەمىر جولى» ۇلتتىق كومپانياسىمەن كەلىسسوزدەر جۇرگىزىلۋدە. قاجەت بولعان جاعدايدا مونيتورينگ جانە جەدەل شارالار قابىلداۋ ءۇشىن جەكە شتاب قۇرىلاتىن بولادى.
