اقتوبەدە ءبىرىنشى سىنىپقا باراتىن 42 وقۋشىعا مانتۋدىڭ ورنىنا تۋبەركۋلەزگە قارسى ءتىرى ۆاكتسينانى سالىپ جىبەرگەن. بۇل قاتەلىكتى اتا-انالار ەكى اپتا وتكەن سوڭ ءبىر-اق بىلگەن، دەپ حابارلايدى “ادىرنا” ۇلتتىق پورتالى "استانا" تەلەارناسىنا سىلتەپ.
تەلەارنا مالىمەتىنشە، №74 ورتا مەكتەپتىڭ 42 وقۋشىسىنىڭ جاقىندارى جاۋاپسىز مەديتسينا قىزمەتكەرلەرىن جاۋاپقا تارتۋدى تالاپ ەتىپ وتىر. ال اتا-انالاردىڭ ايتۋىنشا، بالالاردىڭ كوپشىلىگى وزدەرىن جايسىز سەزىنەدى. ەكپە سالعان جەر قاتتى ءىسىپ، ىرىڭدەگەن. ءتىپتى قولدارىن كوتەرە الماي قالعاندارى دا بولىپتى. انىقتاي كەلە، بالالارعا مانتۋدىڭ ورنىنا يىققا سالاتىن ءتىرى ۆاكتسينا ەگىلگەنى انىقتالعان.
"جيۆايا" ۆاكتسينا ەنگىزىلىپ كەتكەن. ول اعزاداعى بارلىق جاسۋشانى وياتادى دەيدى. ەندى باستالىپ جاتىر. پروتسەسس ءجۇرىپ جاتىر. مىنە، ەكى جەتىدەن اسىپ كەتتى. بالا قولىن كوتەرە المايدى. بەزدەرى شوشىنعان. وزىمەن ءوزى جاتا بەرەدى. السىزدىك پايدا بولدى", - دەيدى اتا-انا راۋشان يساەۆا.
مەديتسينا قىزمەتكەرلەرى اتا-انالاردان التى ايدى كۇتۋدى سۇراعان. سول كەزدە ۆاكتسينا كۇشى جويىلاتىن كورىنەدى.
"قۇتىنىڭ سىرتىندا جازىلىپ تۇرادى ەكەن ءبارى. ءتۇسى دە باسقا بولادى. سوندا قالاي شاتاستىرعان؟ تۇك تۇسىنىكسىز. بىلەك تەرىسى وتە جۇقا. اعزاعا ۆاكتسينا ءتۇسىپ ۇلگەردى. ولار بىزگە 6 اي كۇتۋدى سۇرايدى. كۇتىپ وتىراتىن بولساڭ، ەشكىم كەپىلدىك بەرمەيدى. مۇگەدەكتىككە الىپ كەلۋى مۇمكىن", - دەيدى تاعى ءبىر اتا-انا شىنار بەكبولاتقىزى.
ۆاكتسينانى شاتاسىپ سالعان مەديتسينا قىزمەتكەرلەرى جەكە كلينيكانىڭ ماماندارى كورىنەدى. ولار مەملەكەتتىك تاپسىرىس بويىنشا قىزمەت كورسەتكەن. وسىنداي جاعدايدان كەيىن دارىگەر دە، مەدبيكە دە جۇمىستان بوساتىلعان. پروكۋراتۋرا تەكسەرىس جۇرگىزىپ جاتىر.
"قاتەلىكتى جىبەرگەن - مەديتسينا قىزمەتكەرلەرى. ولار ءوز قاتەلىكتەرىن مويىنداپ وتىر. ەندى 42 بالا وسىنداي جاعداي بولعان سوڭ، نە بولاتىنىن ەشكىم ايتا المايدى. تەك قانا ءبىزدىڭ ءوزىمىز ايتاتىنىمىز، باسقا جەرگە سالىنىپ، تەحنيكالىق اقاۋ كەتكەنى راس", - اقتوبە وبلىستىق دسب باسشىسىنىڭ ورىنباسارى باقىتجان تۇلكىباەۆا.
”ادىرنا” ۇلتتىق پورتالى
