بۇگىندە قازاقستاننىڭ ەڭبەك نارىعىندا جۇمىس ىستەۋدى كوزدەيتىن رەسەيلىك ازاماتتار سانى 31 مىڭنان اسادى. بۇل تۋرالى ەڭبەك جانە حالىقتى الەۋمەتتىك قورعاۋ ءمينيسترى تامارا دۇيسەنوۆا ورتالىق كوممۋنيكاتسيالار قىزمەتىنىڭ الاڭىندا وتكەن بريفينگ بارىسىندا ايتتى، دەپ جازادى "ادىرنا" ۇلتتىق پورتالى.
"ازاتتىق رۋحى" پورتالىنىڭ حابارلاۋىنشا، رەسەي ەلىنەن ەلىمىزگە اعىلىپ كەلىپ جاتقان ازاماتتاردىڭ باسىم بولىگى موبيليزاتسيادان قاشقاندار. دەسە دە اراسىندا قازاقستاندا ۋاقىتشا تۇرىپ، ەڭبەك نارىعىنان بوس جۇمىس ورنىن ىزدەپ جۇرگەندەر دە بار.
«جىل باسىنان بەرى 262 مىڭ رەسەي ازاماتى قازاقستاندا ۋاقىتشا تۇرىپ جاتىر. ونىڭ ىشىندە 6 518-ءى كەلۋ ماقساتتارىندا جۇمىسقا ورنالاسۋدى كورسەتكەن. بىزدە قازىر 8,7 ملن ازامات جۇمىسپەن قامتىلعان. ونىڭ ىشىندە قانشا شەتەلدىككە جۇمىس ورنى بەرىلگەنىنە توقتالار بولسام، بيىل ءبىز 28 مىڭ شەتەلدىك جۇمىسشىعا كۆوتا بەردىك. بىراق ونىڭ تەك 15 مىڭىنا عانا جۇمىس ىستەۋگە رۇقسات بەرىلدى. ەەو-نىڭ قۇرامىنا كىرەتىن مەملەكەتتەر ءۇشىن كۆوتا قاراستىرىلماعان. بۇل رەتتە قازاقستان ازاماتتارى دا وداقتىڭ قۇرامىنداعى ەلدەرگە بارىپ نەمەسە ولار بىزگە كەلىپ رۇقسات الماي-اق، جۇمىس ىستەي بەرۋلەرىنە بولادى»، - دەدى مينيستر.
بۇل رەتتە مينيستر تامارا دۇيسەنوۆا ەلىمىزدىڭ ەڭبەك نارىعىندا ناقتى قانشا رەسەيلىك ازامات جۇمىس ىستەيتىنىن دە ايتىپ ءوتتى.
«پاندەمياعا دەيىن قازاقستانعا 24 816, 2019 جىلى 30 مىڭ، 2020 جىلى 33 مىڭ، بىلتىر 32 مىڭ رەسەيلىك ازامات كەلدى. ءبىزدىڭ ەڭبەك نارىعىندا 25 301 رەسەيلىك ازامات بار. وعان قازىرگى 6 518 ازاماتتى قوسساق، شامامەن 32 مىڭ رەسەيلىك ءبىزدىڭ نارىقتا ەڭبەك ەتۋدى كوزدەيدى. ەلىمىزگە شەتەلدەن جۇمىس ىستەۋ ماقساتىندا كەلگەن ازاماتتارعا مونيتورينگ پەن باقىلاۋ تۇراقتى تۇردە جۇرگىزىلىپ وتىرادى. سوندىقتان دا بۇل جاعداي ءبىزدىڭ ۇلتتىق ەڭبەك نارىعىمىزعا كەرى اسەر ەتەتىنىنە الاڭداۋشىلىق تانىتۋدىڭ قاجەتى جوق»، - دەدى ول.
"ادىرنا" ۇلتتىق پورتالى
