Búginde Qazaqstannyń eńbek naryǵynda jumys isteýdi kózdeıtin reseılik azamattar sany 31 myńnan asady. Bul týraly Eńbek jáne halyqty áleýmettik qorǵaý mınıstri Tamara Dúısenova Ortalyq kommýnıkaııalar qyzmetiniń alańynda ótken brıfıng barysynda aıtty, dep jazady "Adyrna" ulttyq portaly.
"Azattyq rýhy" portalynyń habarlaýynsha, Reseı elinen elimizge aǵylyp kelip jatqan azamattardyń basym bóligi mobılızaııadan qashqandar. Dese de arasynda Qazaqstanda ýaqytsha turyp, eńbek naryǵynan bos jumys ornyn izdep júrgender de bar.
«Jyl basynan beri 262 myń Reseı azamaty Qazaqstanda ýaqytsha turyp jatyr. Onyń ishinde 6 518-i kelý maqsattarynda jumysqa ornalasýdy kórsetken. Bizde qazir 8,7 mln azamat jumyspen qamtylǵan. Onyń ishinde qansha sheteldikke jumys orny berilgenine toqtalar bolsam, bıyl biz 28 myń sheteldik jumysshyǵa kvota berdik. Biraq onyń tek 15 myńyna ǵana jumys isteýge ruqsat berildi. EEO-nyń quramyna kiretin memleketter úshin kvota qarastyrylmaǵan. Bul rette Qazaqstan azamattary da odaqtyń quramyndaǵy elderge baryp nemese olar bizge kelip ruqsat almaı-aq, jumys isteı berýlerine bolady», - dedi mınıstr.
Bul rette mınıstr Tamara Dúısenova elimizdiń eńbek naryǵynda naqty qansha reseılik azamat jumys isteıtinin de aıtyp ótti.
«Pandemııaǵa deıin Qazaqstanǵa 24 816, 2019 jyly 30 myń, 2020 jyly 33 myń, byltyr 32 myń reseılik azamat keldi. Bizdiń eńbek naryǵynda 25 301 reseılik azamat bar. Oǵan qazirgi 6 518 azamatty qossaq, shamamen 32 myń reseılik bizdiń naryqta eńbek etýdi kózdeıdi. Elimizge shetelden jumys isteý maqsatynda kelgen azamattarǵa monıtorıng pen baqylaý turaqty túrde júrgizilip otyrady. Sondyqtan da bul jaǵdaı bizdiń ulttyq eńbek naryǵymyzǵa keri áser etetinine alańdaýshylyq tanytýdyń qajeti joq», - dedi ol.
"Adyrna" ulttyq portaly
