قازاقستان رەسپۋبليكاسىنا كەلىپ جاتقان رەسەي ازاماتتارىنىڭ ارتۋىنا بايلانىستى ىشكى ىستەر مينيسترلىگىنىڭ كوشى-قون قىزمەتى رەسمي تۇردە مالىمدەمە جاسادى، دەپ حابارلايدى «ادىرنا» ءتىلشىسى.
«قازاقستاندا ميگرانتتاردىڭ كەلۋى مەن بولۋى كوشى-قون باقىلاۋىندا. شەتەلدىكتەردىڭ قازاقستاندا بولۋ ءتارتىبى زاڭمەن رەتتەلەدى. بىردە-ءبىر شەتەل ازاماتى كوشى-قون زاڭناماسىنىڭ تالاپتارىن ورىنداماي، مەملەكەتىمىزدىڭ اۋماعىندا بولۋعا قۇقىعى جوق. ەۋرازيالىق ەكونوميكالىق وداققا مۇشە مەملەكەتتەردىڭ ازاماتتارى ءۇشىن قازاقستان رەسپۋبليكاسىندا بولۋدىڭ رۇقسات ەتىلگەن مەرزىمى مەملەكەتتىك شەكارادان وتكەن كۇننەن باستاپ، ورتاق ەرەجە بويىنشا 90 كۇننەن كەيىن اياقتالادى»،—دەلىنگەن حابارلامادا.
ستاتيستيكاعا سۇيەنسەك، بيىل قازاقستانعا 4,3 ملنعا جۋىق شەتەلدىك كەلسە، 4,1 ملن كەتكەن، ونىڭ ىشىندە 1 660 000 رەسەي فەدەراتسياسىنىڭ ازاماتتارى كەلگەن جانە 1 640 000 كەتكەن.
