ەستونيا مەن لاتۆيا موبيليزاتسيادان قاشقان رەسەي ازاماتتارىن ەلگە كىرگىزبەيدى. بۇل تۋرالى ەستونيانىڭ پرەمەر-ءمينيسترى كايا كاللاس پەن لاتۆيانىڭ سىرتقى ىستەر ءمينيسترى ەدگار رينكەۆيچ مالىمدەدى، دەپ جازادى "ادىرنا" ۇلتتىق پورتالى.
"بارلىق ازاماتتار ءوز مەملەكەتىنىڭ ارەكەتتەرى ءۇشىن جاۋاپ بەرەدى، بۇل رەسەي ازاماتتارىنا دا قاتىستى. بۇل ءوز ەلىنەن قاشىپ بارا جاتقان رەسەيلىكتەرگە باسپانا بەرۋگە نەگىز بولا المايدى. ولار بۇل سوعىسقا قارسى ەكەندىكتەرىن ءبىلدىرىپ، مالىمدەۋى كەرەك", — دەدى ەستونيانىڭ پرەمەر-ءمينيسترى كاللاس.
لاتۆيا ءسىم باسشىسى دا رەسەي ازاماتتارىنا ۆيزا بەرىلمەيتىنىن مالىمدەدى.
"قاۋىپسىزدىكتى ساقتاۋ ماقساتىندا لاتۆيا موبيليزاتسيادان جالتارعان رەسەي ازاماتتارىنا ۆيزا تۇرلەرىن بەرمەيدى، سونىمەن قاتار 19 قىركۇيەكتەن باستاپ ەنگىزىلگەن شەنگەن ۆيزالارى بار رەسەي ازاماتتارى ءۇشىن شەكارادان وتۋگە قويىلعان شەكتەۋلەرىن وزگەرتپەيدى", — دەپ مالىمدەدى لاتۆيا ءسىم باسشىسى.
"ادىرنا" ۇلتتىق پورتالى
