مىنا ومىردەن كوپ نارسەنى از ۇقتىم،
كىنالاۋىم ەمەس ءسىزدى جازىقتىم.
مەنى اقىنىم، اق گۇلدەرگە تەڭەمە!
مەن... مەن گۇلدەن دە نازىكپىن...
بۇگىن الماتى قالاسى قازاق مەملەكەتتىك قىزدار ۋنيۆەرسيتەتىندە جاس اكتريسا، تالانتتى اقىن اقگۇل ايداربەكقىزىنىڭ «مەن گۇلدەن دە نازىكپىن...» اتتى تۇڭعىش جىر جيناق كىتابىنىڭ تۇساۋكەسەرى ءوتتى.
جىر-جيناقتىڭ شىمىلدىعى جىبەك شاحمارداننىڭ «نازقوڭىر» كومپوزيتسياسىمەن اشىلىپ ارى قاراي اۆتوردىڭ بىرنەشە ولەڭدەرى وقىلدى.
ەركەلەگىم كەلىپ كەتتى...
ءسىزسىز كەشكەن كۇندەرىمە كوندىگە،
سۇلباڭىزدى ىزدەپ ءجۇرمىن كوشەدەن..
الدە، سىزگە ەركەلەگىم كەلدى مە؟
وكسىپ- وكسىپ جىلاپ الدىم كەشە مەن.
سەندەلدىم-اۋ..توڭىپ قالدىم ءبىرشاما،
..ءمولدىر كوزىم..
الاسۇرىپ ىزدەدى.
جۇزىڭىزدەن ىزعار شاشىپ تۇرسا دا،
"..قوڭىر قوزىم" دەۋشەدىڭىز ءسىز مەنى.
ولەڭ ءوردىم قالامىممەن باق قازىپ،
تىم كەساپات سەزىمىمە قايعى الا.
..سىزگە بۇگىن..
..جۇرەگىممەن..
..ءناپ-نازىك..
ەركەلەگىم كەلىپ كەتتى ءجاي عانا..
ۇركەك ويدىڭ اياسى دا كەڭ ەدى،
كەۋدە تۇستى شارپىپ الدى جالماي سىز،
شەر قۇشاقتا ەرىپ كەتكىم كەلەدى،
ال ءسىز ءتىپتى ەركەلەتە المايسىز..!
سەرتتەن تايىپ كەتكەنىممەن شەگىنىپ،
شەربەت مۇڭعا ىنتىق ءارى قۇمار كۇز.
بالكىم، قازىر وزگە جاندى ەلىرىپ،
ەركەلەتىپ وتىرعان دا شىعارسىز..!
كىتاپتىڭ تۇساۋىن سەرىك قالي، دارمەن سىمايل، اعايشا يساعۇل كەسىپ اۆتورعا شىعارماشىلىق تابىس تىلەپ، تىلەك-باتالارىن بەردى.
جىر-جيناقتىڭ تۇساۋكەسەرىنە اقىن، ساياسي جۋرناليست قاجىمۇقان عابدوللامەن اقىن باتىرحان سارسەنحان، ەرجان يسا جىردان شاشۋ شاشتى.
جىر كەشىندە اۆتوردىڭ ەڭ جاس وقىرمانى بەكاسىل ەردوسۇلى اۆتوردىڭ «دوستىق» ولەڭىن جاتقا وقىپ جينالعان كوپشىلىكتىڭ ىقىلاسىنا بولەندى.
دوستىق
شىن دوستىققا جەتەلەدى بار ماڭىڭ،
جولداستىققا قول بۇلعادى ارنا مىڭ.
بىراق، سونشا وسەك- ايان سوزدەردەن،
بىلەسىڭ بە؟
بيىك تۇرا المادىڭ.
دوستىقپەنەن + قۇپيا ما = قۇت ەگىز؟
جانىمىزدى تۇڭىلتپەي- اق تۇتەرمىز.
سىرعا بەكەم بولا الماعان جانداردان،
بىزدەر وسى، نە مىقتىلىق كۇتەمىز؟
قاڭقۋ سوزدەر قاسىرەتپەن ۇق قايعى،
مۇمكىن كەرىس ارامىزدى نىقتايدى.
ءبىر بىلەرىم، ءسوز قۋعاننىڭ بəرىنەن،
ەشقاشان دا دوستىق دەگەن شىقپايدى!
شىققانىمەن سان شىڭىراۋ، جار الدان،
جان ەمەس پە ەڭ ءبىر بيىككە بارا العان؟!
بىراق، سەنىڭ əسپەتتەگەن دوستىعىڭ،
بۇل دۇنيەدە بولماۋى ءۇشىن جارالعان
اقگۇل ايداربەكقىزى
جىر كەشى انگە تولى. گيتارانىڭ، باياننىڭ سۇيەمەلدەۋىمەن بىرنەشە اندەر دە شىرقالدى. سونىڭ ءبىر مىسالى – اقگۇلدىڭ جاقىن قۇربىسى، سىر ءوڭىرىنىڭ تۋماسى، ايتىسكەر اقىن، جازبا اقىن جىبەك شاحماردانقىزىنىڭ "اپپاق گۇلگە" اتتى ازىلگە تولى ارناۋ ولەڭىن مەرۋەت گيتارامەن ورىنداپ شىققان ءساتى:
اپپاق گۇلگە
تىنىش ەدى ءومىرىڭ،
ولەڭ ءورىپ وزگەردى،
الابۇرتىپ كوڭىلىڭ،
شابىتىڭ دا تەز كەلدى.
قايىرماسى:
ءسوز تاباسىڭ ايتۋعا،
جۇرگەنىڭ جوق قىسىلىپ.
قارا قازاق حالقىنا،
Əپپاق جىرلار، əپپاق جىرلار، əپپاق جىرلار ۇسىنىپ.
كۇلىپ كوزىڭ نۇرلانا،
جەتكىزەسىڭ سەزىمدى.
سىنباي əركەز سىنعا دا،
جانسىڭ ارلى، ءتوزىمدى.
قايىرماسى:
ءسوز تاباسىڭ ايتۋعا،
جۇرگەنىڭ جوق قىسىلىپ.
جاقىندارىڭ كەلىپ تۇر،
Əپپاق گۇلدەر، əپپاق گۇلدەر، əپپاق گۇلدەر ۇسىنىپ.
جىر-جيناقتىڭ سوڭى اۆتوردىڭ قولتاڭباسىمەن كىتاپ الۋ، اسەرلى ءساتتىڭ كۋاسى- اۆتورمەن فوتوعا تۇسۋمەن اياقتالدى
جاندوس ماقسۇتقاليۇلى.
"ادىرنا" ۇلتتىق پورتالى.
فوتو اۆتوردان.
P.S: جىر-جيناقتىڭ فوتو-ۆيدەوسىنىڭ تولىق نۇسقاسى اۆتوردىڭ youtube كانالىمەن "ادىرنا" سايتىندا
كانالعا سىلتەمە:
https://www.youtube.com/channel/UCI5mtdJtgSQX2-nVeL54iKQ?view_as=subscriber
