وبلىستا «نۇرلى جەر» مەملەكەتتىك باعدارلاماسى بويىنشا تۇرعىن ءۇي سالۋعا 7,19 ملرد تەڭگە قاراجات بولىنگەن. بۇل جايىندا وبلىستىق قۇرىلىس باسقارماسىنىڭ ءبولىم باسشىسى ابزال جۇماعاليەۆ حابارلادى.
قازىرگى تاڭدا رەسپۋبليكا بويىنشا تۇرعىن ءۇي قۇرىلىسى ەرەكشە قارقىن الىپ كەلەدى. سونىڭ ەسەبىنەن باسپانا كەزەگىندە تۇرعان ازاماتتاردىڭ سانى كەمىپ، جەكە تۇرعىن ۇيگە يە بولۋدا. ەل ازاماتتارى تۇرمىسىنىڭ جوندەلۋى ءۇشىن مەملەكەت تاراپىنان جاسالعان قولداۋلار مەن زاماناۋي باعدارلامالاردىڭ اسەرى مول. جىل سايىن جاسامپاز جوبالار ارقىلى الەۋمەتتىك جاعدايى تومەن، مۇمكىندىگى شەكتەۋلى جاندار ءبىرىنشى كەزەكتە باسپاناعا يە بولۋى جاعى قاراستىرىلعان.
2021 جىلى «نۇرلى جەر» باعدارلاماسى اياسىندا ورال جانە اقساي قالالارىندا كوپ قاباتتى 5 ءۇي جانە اۋىلدىق جەرلەردە 51 باسپانا قۇرىلىسى اياقتالعان. ياعني «وتباسى بانك» اق سالىمشىلارىنا – 476, الەۋمەتتىك سانات بويىنشا كەزەكتە تۇرعاندارعا 436 پاتەر بەرىلگەن. ءۇي قۇرىلىسىنا بارلىق قارجىلاندىرۋ كوزدەرىنەن 192,8 ملرد تەڭگە بولىنگەن. وبلىستىق قۇرىلىس باسقارماسىنىڭ ءبولىم باسشىسى ابزال جۇماعاليەۆ اتاپ وتكەندەي اۋماقتا 1993-2020 جىلدارى قۇرىلىس جۇمىسىنا جۇمسالاتىن قاراجات كولەمى 14,6 ملن تەڭگەدەن 173,1 ملرد تەڭگەگە دەيىن (12 مىڭ ەسە) ۇلعايىپتى. – تاۋەلسىزدىك جىلدارى وبلىستا 5,9 ملن شارشى مەتر تۇرعىنجاي پايدالانۋعا بەرىلدى. «قولجەتىمدى باسپانا»، «نۇرلى جول»، «نۇرلى جەر» باعدارلامالارى اۋقىمىندا جاڭا شاعىناۋداندار سالىندى.
باعدارلاما تەتىكتەرى ارقىلى تابىس دەڭگەيى ءار ءتۇرلى ازاماتتاردىڭ باسپانا ساتىپ الۋىنا ناقتى مۇمكىندىك پايدا بولدى. 2010-2020 جىلدارى ءۇي سالۋعا جانە ينجەنەرلىك-كوممۋنيكاتسيالىق جەلىلەردى تارتۋعا مەملەكەتتىك بيۋدجەتتەن 109,5 ملرد تەڭگە باعىتتالدى،-دەدى وبلىستىق قۇرىلىس باسقارماسىنىڭ ءبولىم باسشىسى ابزال جۇماعاليەۆ.
