قازاقستاندى 30 جىل بيلەگەن ەكس-پرەزيدەنت نۇرسۇلتان نازارباەۆتىڭ وتباسى زاڭسىز بايۋىن توقتاتار ەمەس. كۇنى كەشە عانا نازارباەۆ اۋلەتىنىڭ تۋىستارى ۇستالىپ، تەرگەلگەن بولاتىن. سونداي-اق، شەتەلگە كەتكەن قارجىلاردىڭ بىرنەشە بولىگى ەلگە قايتارىلادى دەپ بەكىتىلدى. الايدا قازاقستاننىڭ ەكس-پرەزيدەنتى نۇرسۇلتان نازارباەۆتىڭ كەنجە قىزى ءاليا نازارباەۆانىڭ ءتۇرلى قالدىقتى وڭدەۋمەن اينالىساتىن 8 جاۋاپكەرشىلىگى شەكتەۋلى سەرىكتەستىگىمەن (جشس) تىكەلەي بايلانىسى بار Green Future Management LTD جەكە سەرىكتەستىگىنىڭ نەگىزىن قالاۋشى ەكەنى انىقتالدى. بۇل كومپانيا قالاي زاڭسىز ارەكەت ەتىپ وتىر؟ بۇل تۋرالى “ادىرنا” ۇلتتىق پورتالى زەرتتەۋ جۇرگىزدى.
قازىرگى تاڭدا قازاقستاندا قالدىقتاردى باسقارۋ قيىن كەزەڭدەردى باستان وتكەرۋدە. سىرت كوزگە قوقىستاردى تاسىمالدايتىن جەر جەتكىلىكتى، زاڭسىز ۇيىندىلەر جويىلىپ، ەكولوگتار قوقىس ماسەلەسىن شەشىپ، جول كارتاسىن ۇسىنىپ جاتقانداي كورىنەدى. الايدا، ەلىمىزدىڭ استاناسىندا قالدىقتاردى وڭدەۋ ۇلكەن ماسەلەگە اينالىپ وتىر.
سوندىقتان سوڭعى 5 جىلعا قوقىستاردى تازالاۋ جۇمىستارىنا تەندەر جاريالانعان بولاتىن. تەندەر سيپاتتاماسى: «...قاتتى تۇرمىستىق قالدىقتاردى جيناۋدىڭ ورتالىقتاندىرىلعان جۇيەسىن ۇيىمداستىرۋ ماقساتىندا نۇر-سۇلتان قالاسىندا قالدىقتاردى شىعارۋ ۇيىمىنىڭ فۋنكتسيالارىن جۇزەگە اسىرۋ» دەپ اتالدى. تەندەر بويىنشا، cاۋدا-ساتتىقتىڭ ءبىرىنشى كەزەڭى وتكەنىمەن، بۇل جوسپارداعى 2022 جىلدىڭ 8 ماۋسىمىندا بولماعان. ال بۇل تەندەردى جەڭگەن كومپانيانىڭ قۇرىلتايشىسى - ءاليا نازارباەۆا.
ءاليا نازارباەۆانىڭ قالتاسىنا ءۇڭىلۋىمىزدىڭ باستى سەبەبى - تىكەلەي حالىقتىڭ قالتاسىنان قوقىس جيناۋدان تۇسكەن اقشا مەملەكەتكە ەمەس، ءبىرىنشى پرەزيدەنتكە جاقىن ادامدارعا تۇسە باستاعانى. سونداي-اق، مونوپوليالىق بيزنەستىڭ قارقىن الۋى دا باستى سەبەپ.
“Shishkin Like” يۋتۋب ارناسىنىڭ زەرتتەۋىنشە، تۇڭعىش پرەزيدەنتتىڭ كەنجە قىزى قوقىس جيناۋدان تۇسكەن اقشانى پايدالانىپ وتىرعانى انىقتالدى. قالدىقتاردى جيناۋدىڭ ءوزى مەملەكەتكە تاپسىرىلعانىمەن، قوقىستى جاعۋ زاۋىتتارى تۋرالى باستاما اياقسىز قالعان. بىراق ەلىمىزدىڭ استاناسىندا جانە باسقا دا بىرنەشە قالادا كەز كەلگەن قوقىستى شىعارۋ جانە كادەگە جاراتۋ ءالى كۇنگە دەيىن ءاليا نازارباەۆامەن تىكەلەي بايلانىستى.
«قوقىس بيزنەسىنىڭ يمپەرياسى»
نازارباەۆاعا تيەسىلى جانە باسقا دا قوقىس شىعاراتىن كاسىپورىنداردى باقىلايتىن Green Future Management LTD كومپانياسى بار. كوپ ەلدە بيزنەستىڭ بۇل ءتۇرىن “مافيا” دەپ سانايتىنى كەزدەيسوق ەمەس. ويتكەنى، باقىلاۋ ءالسىز بولعان جەردە ۇلكەن پايدا بولۋى مۇمكىن. الايدا سىرت كوزگە كوپ اقشا اكەلمەيتىندەي كورىنگەنىن پايدالانعان ءاليا نازارباەۆا دا سول ۇراندى باسشىلىققا العان سەكىلدى. ءبىر قىزىعى، بۇل بيزنەسكە قاتىستى مەملەكەتتىڭ ازىرگە ەشقانداي سۇراعى جوق. ول تەك قالدىقتاردى جيناعان “روپ وپەراتورىنىڭ” قىزمەتىنە عانا نازار اۋدارۋدا.
وسى ۋاقىتقا دەيىن، ءتىپتى قازىر دە ەلوردا قوقىسىن تازالاۋمەن «Clean City NC» كومپانياسى جاۋاپتى بولاتىن. قاڭتار قاقتىعىستارىنان كەيىن فاكتىلەر ارالاس الىپساتارلىقتاردىڭ بارلىق ءتۇرى پايدا بولا باستادى. جەلىدە قازاقستان ەكولوگياسى مەن قالدىقتاردى باسقارۋدىڭ قۇپيالارى تۋرالى كوپتەگەن ماتەريالدار دا كەزدەستى. ولارعا بىرتىندەپ توقتالايىق.
نۇر-سۇلتان قالاسىندا قوقىس شىعارۋ ءتاريفى باسقا قالالارمەن سالىستىرعاندا ارزان. ماسەلەن، قوقىس تاستاۋ قۇنى پاتەرلەردە تۇراتىن ءبىر ادامعا شامامەن، 390 - 414 تەڭگە. زاڭدى تۇرعىندارىنىڭ سانى 1 ميلليوندى قۇرايتىن استانالىقتاردىڭ تەك قوقىس شىعارۋعا ايىنا 390-نان 414 ميلليون تەڭگەگە دەيىن تولەيدى.
بۇل ايىنا شامامەن، ءبىر ميلليون دوللاردى قۇرايدى. بىراق نۇر-سۇلتان تەك تۇرعىنداردىڭ عانا ەمەس، مينيسترلىكتەر مەن ساۋداگەرلەر قالاسى. سوندىقتان ءار كەڭسە قوقىس جيناۋ ءۇشىن دە تولەيدى. سوندىقتان بۇل 1 ميلليون دوللاردان دا كوپ.
«قاندى قاڭتاردان» كەيىن ROP Operator كومپانياسىنا جانە ەنشىلەس زاڭدى تۇلعالارعا قاتىستى تەرگەۋ جۇرگىزىلدى. كوپتەگەن ايىپتالۋشى مەن زاڭدى تۇلعالار ءالى دە تەرگەۋ شاقىرۋىن كۇتۋدە.
بۇل «Clean City» كومپانياسىن دا اينالىپ وتپەدى. تەرگەۋ ارەكەتتەرىن جۇرگىزۋدە اشىقتىق بولماعانىنا قاراماستان، بۇل كومپانيانىڭ بۇرىنعى تابىسى قانداي دا ءبىر تۇردە «روپ وپەراتورىنىڭ» ادىلەتسىز اقشاسىنا جانە ءاليا نازارباەۆانىڭ قورعاۋىنا بايلانىستى بولدى دەگەن بولجام بار. بۇگىندە كاسىپورىننىڭ مۇلكى دە، ەسەپشوتتارى دا تاركىلەندى. الايدا ەلوردادا قوقىس شىعارۋىن جالعاستىرىپ كەلەدى.
«Clean City» ۇك سايتىندا ايتىلعانداي، كومپانيا: «قاتتى تۇرمىستىق قالدىقتاردى جيناۋ جانە تاسىمالداۋ بويىنشا كەشەندى جۇمىستار جۇرگىزەدى. ولار نۇر-سۇلتان قالاسى اكىمدىگىنىڭ تابيعي رەسۋرستار جانە تابيعاتتى پايدالانۋدى رەتتەۋ باسقارماسىمەن 2017 جىلدان باستاپ 5 جىل مەرزىمگە جاسالعان كەلىسىم-شارت تالاپتارىنا سايكەس جۇزەگە اسىرىلۋدا. كۇن سايىن: نۇر-سۇلتان قالاسىن تازالاۋعا ەكى اۋىسىمدا 66 قوقىس شىعاراتىن كولىك پەن 25 بىرلىك تەحنيكا شىعادى. 1 - اۋىسىم 06-00-دەن 14-00-گە دەيىن. 2 - اۋىسىم 14-00-دەن 22-00-گە دەيىن» دەلىنگەن.
ەسەپشوتتارى مەن اكتيۆتەرى بۇعاتتالعان كومپانيا قالاي جۇمىسىن جالعاستىرىپ وتىر؟
قاماۋعا الىنعان كومپانيانىڭ نۇر-سۇلتان قالاسىنىڭ تازالىعى ءۇشىن الاتىن اقشاسى، ميلليونداعان دوللارى كىمنىڭ قالتاسىنا ءتۇسىپ جاتقانى دا ۇلكەن ماسەلە. وعان نۇر-سۇلتان قالاسىنىڭ اكىمدىگى، قورشاعان ورتانى قورعاۋ دەپارتامەنتىنىڭ باسشىسى، نۇر-سۇلتان قالاسىنىڭ تابيعات پايدالانۋ باسقارماسى ءاليا قوجاباەۆا مەن قازاقستان رەسپۋبليكاسى سىبايلاس جەمقورلىققا قارسى ءىس-قيمىل اگەنتتىگى قالاي جاۋاپ بەرمەك؟
ءاليا نازارباەۆانى ىقپالى ءالى دە قوقىس بيزنەسىن جالعاستىرۋعا اسەر ەتىپ وتىرعانىن بايقاۋعا بولادى. سوندىقتان “قوقىس حانشايىمىنا” اينالعان ءاليا نازارباەۆاعا تيەسىلى قانداي قوقىس بيزنەسى بار؟
جوعارىدا اتاپ وتكەنىمىزدەي، Adata-نىڭ اقپاراتى بويىنشا، Green Future Management LTD كومپانياسىنىڭ قۇرىلتايشىسى ءاليا نازارباەۆا بولىپ ەسەپتەلەدى. بۇل كومپانيا 24.09.2020 جىلى تىركەلىپ، “كوممەرتسيالىق قىزمەت جانە باسقارۋ ماسەلەلەرى بويىنشا كەڭەس بەرۋ" قىزمەت تۇرىمەن اينالىسادى. ول قۇرىلتايشى رەتىندە ءارتۇرلى قالدىقتاردى، اسىرەسە، اۆتوموبيلدەر مەن شينالاردى قايتا وڭدەۋمەن اينالىساتىن 8 جاۋاپكەرشىلىگى شەكتەۋلى سەرىكتەستىگىمەن (جشس) تىكەلەي بايلانىستى.
Green Future Management LTD جەكە كومپانياسىنا تيەسىلى جشس-ءنىڭ ءبىرى - RecyclingCompany جشس. ول 2016 جىلدىڭ ماۋسىم ايىندا قۇرىلدى. الدىمەن، قۇرىلتايشىسى مۇحامەدياروۆ ءۋاليحان ناريمانۇلى بولدى. كەيىن ورىنباسار عازيز باعلانۇلى، ءارى قاراي ماحادي مەرۋەرت ماحاديقىزى بولدى. مەرۋەرت ماحاديقىزى 2022 جىلدىڭ 12 قاڭتار كۇنى كومپانيا قۇرىلتايشىسى قۇقىعىنان ايىرىلدى. بىراق بۇل كومپانيانىڭ شىن مانىندەگى نەگىزگى قۇرىلتايشىسى ءاليا نازارباەۆا.
TOO RecyclingCompany كومپانياسىنىڭ قىزمەت تۇرىنە نە كىردى؟
- قالپىنا كەلتىرۋگە جاتپايتىن ماشينالار مەن جابدىقتاردى بولشەكتەۋ;
- كومىرسۋتەكتى شيكىزاتتان اتسيكلدى جانە تسيكلدى كومىرسۋتەكتەردى ءوندىرۋ;
- رەزەڭكە تەحنيكالىق بۇيىمداردى ءوندىرۋ;
- شويىن، بولات جانە فەرروقورىتپا ءوندىرۋ;
- اليۋميني ءوندىرۋ;
- باسقا توپتامالارعا ەنگىزىلمەگەن وزگە دە ماشينالاردى، جابدىقتار مەن ماتەريالدىق اكتيۆتەردى جالعا الۋ;
- باسقا توپتامالارعا ەڭگىزىلمەگەن وزگە دە جەكە قىزمەتتەردى ۇسىنۋ.
“RecyclingCompany” وڭدەۋ زاۋىتى قاراعاندى وبلىسى بۇقار جىراۋ اۋدانى دوسكەي اۋىلىندا “سارىارقا” ارنايى ەكونوميكالىق ايماعىنىڭ اۋماعىندا ورنالاسقان. كومپانيا 2017 جىلى ورتالىق ازيا وڭىرىندگى ەكى ءاۆتوموبيلدى كادەگە جاراتۋ جونىندەگى بالاماسى جوق، جالعىز زاۋىت بولىپ تابىلدى جانە اشىلۋىنا نۇرسۇلتان نازارباەۆتىڭ ءوزى كەلدى. جوبا 2015-2019 جىلدارعا ارنالعان يندۋستريالىق-يننوۆاتسيالىق دامۋ مەملەكەتتىك باعدارلاماسى اياسىندا جۇزەگە اسىرىلدى.
فوتو: كارتا: RecyclingCompany
2018 جىلى “حابار” مالىمەتىنشە، ءبىر جىل ىشىندە زاۋىت 57 ەسكى ماشينانى وڭدەگەنىن جانە پلاستماسسا ۇگىندىسىن قوسپاعاندا، وتىز مىڭ توننادان استام قارا جانە ءتۇستى مەتالل العانىن مالىمدەدى.
“RecyclingCompany” جشس جۇمىس سحەماسى بويىنشا، اۆتوموبيلدەردى جيناۋ پۋنكتەرىنە الدىمەن، Autorecycling جشس قىزمەت كورسەتەدى. ولار اۆتوموبيلدەردى بولشەكتەيدى جانە قاۋىپتى كومپانەنتتەرىن الىپ تاستايدى. “روپ وپەراتورى” بەلگىلى وقيعالارعا دەيىن Autorecycling جشس-عا اۆتوموبيل ءۇشىن شامامەن، 18,9 مىڭ تەڭگە تولەدى. سونىمەن قاتار، “RecyclingCompany” جشس “روپ وپەراتورىنان” ءاربىر قايتا وڭدەلگەن اۆتوموبيل ءۇشىن 123 مىڭ تەڭگە الدى.
5 جىل ىشىندە قازاقستاندىقتار 691 ملرد تەڭگەنى “روپ وپەراتورىنا” كادەگە جاراتۋ الىمى ءۇشىن جىبەردى. ونىڭ ىشىندە وتاندىق اۆتووندىرۋشىلەرگە - 338,9 ملرد تەڭگە، سالىق - 49 ملرد تەڭگە، بانكتەردەگى جيناقتار - 200 ملرد تەڭگە، وپەراتورلاردىڭ ەكولوگيالىق شىعىستارى - 102 ملرد تەڭگەنى قۇرادى. ياعني، وسى 102 ملرد تەڭگەنىڭ ءبىر بولىگىن اۆتو وڭدەۋ كومپانيالارى الىپ وتىردى.
“كۋرسيۆ” باسىلىمىنىنىڭ مالىمەتىنشە، 2017 جىلدان باستاپ، “RecyclingCompany” جشس 24,6 ملرد تەڭگە العان. ەگەر 2018 جىلى 57مىڭ ەسكى كولىكتەن 30 مىڭ توننا مەتالل شىعاتىن بولسا، جالپى “روپ وپەراتورى” جۇمىس ىستەگەن جىلدار ىشىندە قايتا وڭدەۋگە تۇسكەن 200 104 ماشينانىڭ ىشىنەن زاۋىت 105 مىڭ تونناعا جۋىق ءتۇستى جانە قارا مەتالل قورىتپالارىن الدى.
نارىقتا قارا جانە ءتۇستى مەتالداردان جاسالعان وڭدەلمەگەن سىنىقتار تونناسىنا 90-105 مىڭ تۇرادى. وسىلايشا، شامامەن قايتالاما شيكىزات ءۇشىن زاۋىتتىڭ ەڭ تومەنگى كىرىسى - 10,5 ملردتى قۇرادى. مۇنىڭ بارلىعى ارينە، ءاليا نازارباەۆانىڭ قالتاسىن قامپيتتى.
ەسكەرەتىن جايت، زاۋىت وندىرەتىن قۇيمالارداعى قورىتپالاردى ەمەس، مەتالل سىنىقتارىنىڭ نارىقتاعى باعالارى بويىنشا، جالپى كىرىستى ەسەپتەدىك. ويتكەنى، كاسىپورىن سايتىندا وندىرىلگەن قايتالاما قارا مەتالل مەن اليۋميني مولشەرى تۋرالى جەكە اقپارات جوق.
دەمەك، “RecyclingCompany” جشس 2017 جىلدان باستاپ، اۆتاكولىكتى قايتا وڭدەۋ جانە شيكىزاتتى ساتۋ ارقىلى 35,1 ملرد تەڭگە پايدا تاپقان. 2017 جىلدان باستاپ، بۇل كومپانيا مەملەكەت بيۋدجەتىنە سالىق تۇرىندە 5 876 746 756 تەڭگە اۋداردى.
ءساۋىر ايىنىڭ باسىندا “وپەراتور روپ” جشس بۇرىڭعى باسقارۋشى ديرەكتورى پايدالانۋدان شىققان كولىك قۇرالدارىن كادەگە جاراتۋدىڭ جوعارى قۇنىن بەلگىلەۋ ارقىلى 13 ملرد تەڭگەدەن استام ۇرلىق جاسادى دەگەن كۇدىكپەن ۇستالدى. اقشا “RecyclingCompany” جشس كومپانياسىنا زاڭسىز اۋدارىلدى.
قوقىس بيزنەسىمەن اينالىساتىن كومپانيالاردىڭ ءبىرى - “Autorecycing” جشس. ول 28 اقپان 2020 جىلى تىركەلگەن. وسى ۋاقىت ارالىعىندا بيۋدجەتكە سالىق تۇرىندە 385 399 606 تەڭگە اۋدارعان. باستاپقىدا قۇرىلتايشىسى ۋترەحتتە تىركەلگەن گوللانديالىق كومپانيا Planetcare Company B.V. قىزمەتكەرى مەن قازاقستاندىق “PlanetCare Management” جشس بولدى. ول كومپانيانىڭ باسشىسى - ارەنوۆ ارمان قاناتۇلى. ونىمەن قوسا، ول Green Future Management LTD كومپانياسىنىڭ دا باسشىسى رەتىندە قىزمەت ەتتى. ال “PlanetCare Management” قۇرىلتايشىسى اپىسباەۆا كارينا اليحانوۆنا بولدى. ول بقو بۇرىنعى اكىم ورىنباسارىنىڭ اپكەسى بولۋى مۇمكى. الدىمەن، ول 25.12.2020 جىلى “Planetcare Company”- دان ۇلەسىن الدى. ال 30.06.2021 كۇنى جالعىز قۇرىتايشىسى بولدى
قۇرىتايشىسى ءاليا نازارباەۆا بولىپ ەسەپتەلەتىن Green Future Management LTD كومپانياسى ارقىلى باسقاراتىن تاعى ءبىر جشس - Clean City NC. جوعارىدا ايتىپ وتكەنىمىزدەي، كومپانيا بۇعاتتالعانىمەن، ءالى كۇنگە دەيىن قىزمەتىن توقتاتقان جوق.
كومپانيا سايتىندا ايتىلعانداي، كاسىپورىن نۇر-سۇلتان اكىمدىگىنە قارايدى. سونداي-اق، “نۇر-سۇلتان قالاسىنىڭ ايماعىنان قاتتى تۇرمىستىق قالدىقتاردى شىعارۋ ءۇشىن قوقىس شىعاراتىن ۇيىمدى تاڭداۋ” بويىنشا تەندەردىڭ جەڭىمپازى اتانعان. ياعني، بۇل كاسىپورىن ەلوردانىڭ بارلىق ايماقتارىنان قوقىستى پاليگونعا جەتكىزەدى. 2017 جىلدان باستاپ، Clean City NC بيۋدجەتكە 4 092 344 424 تەڭگe سالىق تولەدى.
Clean City NC جشس مەملەكەتتىك ساتىپ الۋدىڭ بەلسەندى قاتىسۋشىسى 2022 جىلى قالدىقتاردى جيناۋ، وڭدەۋ جانە جويۋ بويىنشا قىزمەتتەردى ۇسىنۋعا كەلىسىمشارت جاسادى. ونىڭ 111-ءى تىكەلەي شارت جاساسۋ ارقىلى. جالپى 2017 جىلدان باستاپ 2022 جىلعا دەيىن كاسىپورىن 953 86 150 تەڭگە سوماسىنا مەملەكەتتىك ساتىپ الۋ شارتتارىن جاساستى.
سونداي-اق، وپەراتور ROP 2018 جىلى “Clean City NC” جشس-عا 1 713 733 629 تەڭگە بەرەدى. ونى بەرۋدەگى ماقساتى كولىك، كونتەينەر سىندى كەرەك-جاراقتار الۋ ەدى. سونىمەن قاتار، بەرىلگەن قارجى قايتارۋدى تالاپ ەدى. “Clean City NC” جشس بۇل قارجىنى الادى. الايدا قارجى كەيىن قايتارىلماي قالادى. ۇكىمەتكە تيەسىلى قارجىنى Clean City NC جشس قاشان قايتارماق؟
Green Future Management LTD جەكە كومپانياسى 01.04.2021 جىلى عانا Clean City NC جشس نىڭ قۇرىلتايشىسى بولعان. بۇعان دەيىن تىكەلەي قۇرىتايشىسى ءاليا نازارباەۆا (12.02.2021) بولدى، ال وعان دەيىن جوعارىدا اتالعانداي مەرۋەرت ماحاديقىزى بولعان.
ءبىر قىزىعى، كومپانياعا 2017 جىلى 26 مامىردا اكىمدىك “مەملەكەتتىك ساتىپ الۋ” زاڭى بويىنشا 5 جىلعا تەندەر بەرەدى. نەگىزى، زاڭ بويىنشا، تەندەر 5 جىلعا ەمەس، ءۇش جىلعا بەرىلۋى قاجەت. بىراق زاڭبۇزۋشىلىق ورىن الىپ، 5 جىلعا تەندەردى العان كومپانيانىڭ تەندەر ۋاقىتى 2022 جىلى 26 مامىردا اياقتالدى. زاڭعا سايكەس، قايتادان تەندەر جاسالىپ، جاڭا كومپانيا اكەلمەسە، 2 ايعا سوزۋعا قۇقىلى. ال 2 اي ءوتتى دەسەك، 26 شىلدەدە جۇمىسى اياقتالۋى كەرەك كومپانيا قىركۇيەكتە دە قىزمەتىن جالعاستىرۋدا.
وتكەنگە ورالساق، ەلوردادا قوقىس وڭدەۋ كەشەنى 2012 جىلى سالىنعان. قتق سۇرىپتاۋ جانە قايتا وڭدەۋ زاۋىتىنىڭ سول كەزدەگى ديرەكتورى ەگور زينگەر مالىمدەگەندەي: “ول ينۆەستيتسيالىق قاراجات ەسەبىنەن، قالا اكىمدىگىنىڭ قولداۋىمەن، مەملەكەت باشىسىنىڭ قاتاڭ باسشىلىعىمەن سالىندى”
2017 جىلى زاۋىت KazRecyclingService جشس-ءنىڭ باسقارۋىندا بولدى. باسپاسوزدەردە مالىمدەگەندەي، كومپانيا نىساندى جاڭعىرتىپ، 11.05.2020 جىلى “Astana Recycling Plant” جشس قۇرىلدى. بۇل كومپانيا دا ەلورداداعى قوقىستارداردى شىعارىپ، قايتا وڭدەۋ ءۇشىن جاۋاپتىلاردىڭ ءبىرى. ال ونىڭ قۇرىلتايشىسى 11.05.2022 جىلدان باستاپ، تاعى دا Green Future Management LTD جەكە كومپانياسى.
2020 جىلدان باستاپ، Astana Recycling Plant جشس مەملەكەتكە 312 158 185 تەڭگە سالىق تولەدى جانە 8 569 412 تەڭگەگە “مەملەكەتتك ساتىپ الۋ” تۋرالى 8 شارت جاساستى.
“ەكو پوليگون استانا” جشس 13.07.2017 جىلى تىركلگەن. ونىڭ قۇرىلتايشىسى “KazRecyclingService” جشس مەن “Clean City NC” بولىپ ەسەپتەلدى.
2018 جىلدان باستاپ، كومپانيا قالدىقتاردى جيناۋ، وڭدەۋ جانە جويۋ بويىنشا قىزمەتتەرگە، قايتالاما شيكىزاتتاردى الۋ بويىنشا قىزمەتتەرگە مەملەكەتتىك ساتىپ الۋ كەلىسىمشارتتارى بويىنشا 831 944 182 تەڭگە ىسكە قوستى. نەگىزگ تاپسىرىس بەرۋشى “استانا تازالىق” جشس. قازىر “سپك اstana“اق قۇرىلتايشىسى
بۇل ءاليا نازارباەۆانىڭ رەسايكلينگتىك كومپانيالارىنىڭ ءبىر بولىگى عانا. ودان بولەك، Green Future Management LTD جەكە كومپانياسى ارقىلى نازارباەۆاعا تيەسىلى “Taza Energy Solutions” جشس، “CLEANCITY Shymkent” جشس مەن “Clean city Aktobe” جشس تيەسىلى. بارلىق جشس-ءنىڭ نەگىزگى قىزمەتى بىردەي. ولار قاۋىپتى ەمەس قالدىقتاردى جيناپ، وڭدەيدى.
سوندا قالاداعى قوقىس بيزنەسىنىڭ بارلىعى مونوپولياعا اينالىپ وتىرعانىن كورۋىمىزگە بولادى. بارلىعىن ءبىر ادام، ءاليا نازارباەۆا باسقارىپ، قارجى دا سونىڭ قالتاسىنا ءتۇسىپ وتىر. الايدا قازاقستاننىڭ پرەزيدەنتى توقاەۆ ساياساتتا دا، ەكونوميكادا دا مونوپوليادان ارىلۋدى باستى ماقسات دەپ اتادى.
«بۇل تۋرالى كوپشىلىك، اسىرەسە، كاسىپكەرلەر جاقسى بىلەدى. بۇل ناعىز باسەكەلەستىككە جانە كەڭىرەك ايتقاندا، ادىلەتتىلىككە جول بەرمەيدى. بۇل ماسەلەنى شەشپەسەك، ەكونوميكامىز دامىمايدى، ىشكى ساياسي جاعداي ودان سايىن قيىنداي تۇسەدى. سوندىقتان ەكونوميكادا بولسىن، ساياساتتا بولسىن، بارىنشا مونوپوليادان ارىلۋ باستى ماقساتىم. ءبىز ولاردان تولىعىمەن قۇتىلۋىمىز كەرەك. ارينە، بۇل وڭاي جۇمىس ەمەس، بىراق ءبىز وعان مىندەتتى تۇردە كىرىسۋىمىز كەرەك. باسقا جول جوق»، - دەگەن ەدى ق.توقاەۆ Qazaqstan تەلەارناسىنا بەرگەن سۇحباتىندا.
مەملەكەت باسشىسى وليگوپوليا ەكونوميكا سالاسىندا تار شەڭبەردەگى ادامداردىڭ ۇستەمدىگى ەكەنىن اتاپ ءوتتى. ال قازاقستاندا بۇل ءۇردىس قارقىن الىپ كەلەدى. “جاڭا قازاقستاندا” ەسكىنىڭ اسەرى قاشان توقتاماق؟
”ادىرنا” ۇلتتىق پورتالى
