تاراز قالاسىندا 1 قىركۇيەك كۇنى سالتاناتتى تۇردە اشىلىپ، لەنتاسى قيىلعان №61 مەكتەپ ءوز جۇمىسىن ءالى باستامادى. قازىرگى تاڭدا ءبىلىم ورداسىندا بىردە-ءبىر وقۋشى وقىمايدى، دەپ حابارلايدى «ادىرنا» ءتىلشىسى ينفورمبيۋرو اقپاراتتىق باعدارلاماسىنا سىلتەمە جاساپ.
رەسمي مالىمەتتەركە سۇيەنسەك، اشىلۋ سالتاناتىنا وبلىستىق ءماسليحات حاتشىسى، قالا اكىمى، ءبىلىم باسقارماسىنىڭ باسشىلارى قاتىسقان. ءسوز العاندار بۇل قۋانىش پرەزيدەنت جولداۋىنىڭ جەمىسى ەكەنىن ەرەكشە اتاپ ءوتتى.
«مەكتەپتى ارالاپ شىقتىم. 600 ورىندىق كەرەمەت مەكتەپ. 4 كومپيۋتەرلىك كلاسى بار. شەبەرحاناسى بار. سپورت زالى بار. كىتاپحاناسى بار. بالالارعا بارلىق جاعداي جاسالعان»،– دەدى وبلىستىق ءماسليحات حاتشىسى ماحمەتعالي سارىبەكوۆ.
الايدا بۇل ءراسىم ادەمى قويىلىم عانا بولىپ شىقتى. سەبەبى مەكتەپ بالا قابىلداۋعا ءالى دايىن ەمەستىگىنەن بولەك، ءتىپتى ءبىلىم باسقارماسىنىڭ قاراماعىنا وتپەگەن-ءدى. 1 قىركۇيەككە جاقىن تۇرعان №50 ورتا مەكتەپتىڭ مۇعالىمدەرى مەن وقۋشىلارى شاقىرتىلعان.
ءبىلىم ورداسىنىڭ ديرەكتورى قارلىعاش قاسىمباەۆا جۋرناليستەرگە وقيعانىڭ ءمان-جايىن ءتۇسىندىرىپ بەرە المادى.
بالالارى جاڭا مەكتەپكە بارۋى ءتيىس بولعان قاينار القابىنىڭ تۇرعىندارى قالا باسشىلىعىنا رەنىشتەرىن جەتكىزدى.
«جاۋاپكەرشىلىك جوق. مەكتەپتى اشىپ، بالا قابىلداماۋى حالىقتى الداۋ شىعار»،– دەيدى اتا-انالاردىڭ ءبىرى اسەل يگىلىكوۆا.
