Taraz qalasynda 1 qyrkúıek kúni saltanatty túrde ashylyp, lentasy qıylǵan №61 mektep óz jumysyn áli bastamady. Qazirgi tańda bilim ordasynda birde-bir oqýshy oqymaıdy, dep habarlaıdy «Adyrna» tilshisi Informbıýro aqparattyq baǵdarlamasyna silteme jasap.
Resmı málimetterke súıensek, ashylý saltanatyna oblystyq máslıhat hatshysy, qala ákimi, Bilim basqarmasynyń basshylary qatysqan. Sóz alǵandar bul qýanysh Prezıdent joldaýynyń jemisi ekenin erekshe atap ótti.
«Mektepti aralap shyqtym. 600 oryndyq keremet mektep. 4 kompıýterlik klasy bar. Sheberhanasy bar. Sport zaly bar. Kitaphanasy bar. Balalarǵa barlyq jaǵdaı jasalǵan»,– dedi oblystyq máslıhat hatshysy Mahmetǵalı Sarybekov.
Alaıda bul rásim ádemi qoıylym ǵana bolyp shyqty. Sebebi mektep bala qabyldaýǵa áli daıyn emestiginen bólek, tipti bilim basqarmasynyń qaramaǵyna ótpegen-di. 1 qyrkúıekke jaqyn turǵan №50 orta mekteptiń muǵalimderi men oqýshylary shaqyrtylǵan.
Bilim ordasynyń dırektory Qarlyǵash Qasymbaeva jýrnalısterge oqıǵanyń mán-jaıyn túsindirip bere almady.
Balalary jańa mektepke barýy tıis bolǵan Qaınar alqabynyń turǵyndary qala basshylyǵyna renishterin jetkizdi.
«Jaýapkershilik joq. Mektepti ashyp, bala qabyldamaýy halyqty aldaý shyǵar»,– deıdi ata-analardyń biri Ásel Igilikova.
