الەۋمەتتىك جەلىلەر مەن مەسسەندجەرلەردە 2023 جىلدىڭ باسىندا قازاقستان ۇقشۇ-عا مۇشەلىگىن توقتاتىپ قويۋدى جوسپارلاپ وتىرعانى تۋرالى حابارلاما تارادى. تارالعان اقپاراتتا مۇشەلىكتەن شىعۋ تۋرالى رەسمي مالىمدەمە ءبىرىنشى قاڭتاردا جاسالاتىنى ايتىلعان. بۇل جالعان بولىپ شىقتى، دەپ حابارلايدى «ادىرنا» ءتىلشىسى stopfake.kz-كە سىلتەمە جاساپ.
قر سىرتقى ىستەر مينيسترلىگى بۇل اقپاراتتى جوققا شىعاردى.
– قازاقستاننىڭ ۇقشۇ-دان شىعۋى تۋرالى جەكەلەگەن الەۋمەتتىك جەلىلەردە تاراعان اقپارات – فەيك جانە شىندىققا جاناسپايدى. قازاقستان ۇقشۇ قۇرىلعالى وعان مۇشە، وسى ۇيىمنىڭ بەلسەندى قاتىسۋشىسى بولىپ تابىلادى. ۇقشۇ-عا مۇشە بولۋ ەلىمىزدىڭ ۇلتتىق مۇددەلەرىنە تولىق ساي كەلەدى. ۇجىمدىق قاۋىپسىزدىك تۋرالى شارتتا وعان قاتىسۋشى مەملەكەتتەر ءۇشىن، ونىڭ ىشىندە قازاقستان ءۇشىن دە قاۋىپسىزدىكتى قامتاماسىز ەتۋگە زاڭدى تۇردە مىندەتتەيتىن كەپىلدىكتەر كوزدەلگەن. بۇدان باسقا، ۇقشۇ شەڭبەرىندە حالىقارالىق تەرروريزمگە، زاڭسىز كوشى-قونعا، ەسىرتكىنىڭ زاڭسىز اينالىمىنا، ترانسشەكارالىق قىلمىستىلىققا، اقپاراتتىق سالاداعى قاتەرلەرگە بىرلەسىپ قارسى ءىس-قيمىل جاساۋ داعدىلارى پىسىقتالادى. ياعني، ۇقشۇ اياسىنداعى ىنتىماقتاستىق قازاقستاننىڭ سىرتقى ساياساتىنىڭ ماڭىزدى باعىتى بولىپ تابىلادى، ەلىمىزدىڭ ۇقشۇ-عا قاتىسۋى قازاقستاننىڭ ۇزاق مەرزىمدى ستراتەگيالىق قۇجاتتارىندا قاراستىرىلعان. جالپى، قازاقستان ۇجىمدىق قاۋىپسىزدىك تۋرالى شارت ۇيىمىنان شىعۋ مۇمكىندىگىن قاراستىرىپ جاتقان جوق،-دەپ حابارلادى ۆەدومستۆونىڭ ءباسپاسوز قىزمەتى.
