Áleýmettik jeliler men messendjerlerde 2023 jyldyń basynda Qazaqstan UQShU-ǵa músheligin toqtatyp qoıýdy josparlap otyrǵany týraly habarlama tarady. Taralǵan aqparatta múshelikten shyǵý týraly resmı málimdeme birinshi qańtarda jasalatyny aıtylǵan. Bul jalǵan bolyp shyqty, dep habarlaıdy «Adyrna» tilshisi stopfake.kz-ke silteme jasap.
QR Syrtqy ister mınıstrligi bul aqparatty joqqa shyǵardy.
– Qazaqstannyń UQShU-dan shyǵýy týraly jekelegen áleýmettik jelilerde taraǵan aqparat – feık jáne shyndyqqa janaspaıdy. Qazaqstan UQShU qurylǵaly oǵan múshe, osy uıymnyń belsendi qatysýshysy bolyp tabylady. UQShU-ǵa múshe bolý elimizdiń ulttyq múddelerine tolyq saı keledi. Ujymdyq qaýipsizdik týraly shartta oǵan qatysýshy memleketter úshin, onyń ishinde Qazaqstan úshin de qaýipsizdikti qamtamasyz etýge zańdy túrde mindetteıtin kepildikter kózdelgen. Budan basqa, UQShU sheńberinde halyqaralyq terrorızmge, zańsyz kóshi-qonǵa, esirtkiniń zańsyz aınalymyna, transshekaralyq qylmystylyqqa, aqparattyq saladaǵy qaterlerge birlesip qarsy is-qımyl jasaý daǵdylary pysyqtalady. Iaǵnı, UQShU aıasyndaǵy yntymaqtastyq Qazaqstannyń syrtqy saıasatynyń mańyzdy baǵyty bolyp tabylady, elimizdiń UQShU-ǵa qatysýy Qazaqstannyń uzaq merzimdi strategııalyq qujattarynda qarastyrylǵan. Jalpy, Qazaqstan Ujymdyq qaýipsizdik týraly shart uıymynan shyǵý múmkindigin qarastyryp jatqan joq,-dep habarlady vedomstvonyń baspasóz qyzmeti.
