استانا قالاسىنىڭ ءماسليحات دەپۋتاتتارى 15 قىركۇيەك كۇنگى قوعامدىق تىڭداۋدا استانا اتاۋىن قايتارۋ تۋرالى باستامانى ءبىراۋىزدان ماقۇلدادى، دەپ حابارلايدى "ادىرنا" ۇلتتىق پورتالى ازاتتىققا سىلتەمە جاساپ.
جيىندا سويلەگەن ازاماتتار استانا اتاۋىن قايتارۋ قاجەتتىگىن اتاپ ءوتتى.
استانانىڭ ونوماستيكا كوميسسياسىنىڭ مۇشەسى بۇركىتباي اياعان استاناعا نۇر-سۇلتان اتاۋىن بەرۋ تۋرالى 2019 جىلعى شەشىمدى ەسكە الىپ، ءبىرىنشى پرەزيدەنت نۇرسۇلتان نازارباەۆتىڭ ەڭبەگىن مويىنداۋ قاجەت بولعانمەن سول كەزدەگى شەشىمنىڭ ءوزى اسىعىس قابىلدانعانىن اتاپ ءوتتى.
"مەملەكەت تاريحىندا مۇنداي وقيعالار بولىپ تۇرادى. قالاعا استانا اتاۋىن قايتارۋ تۋرالى ۇسىنىسىمىز تالاپتارعا سايكەس كەلەدى. ەڭ باستىسى ول جىككە بولىنگەن قوعامدى بىرىكتىرەدى. نۇرسۇلتان ءابىشۇلىنىڭ ءوزى ءتۇسىنىپ، رەنجىمەس دەپ ويلايمىن" دەدى بۇركىتباي اياعان.
ونوماستيكا كوميسسياسىنىڭ تاعى ءبىر مۇشەسى، قازاقستان جۋرناليستەر وداعىنىڭ حاتشىسى داۋلەتكەرەي كاپۇلى "مەملەكەتتىڭ تاعدىرى ءبىر تۇلعانىڭ تاعدىرىنان قىمبات" دەدى.
- نۇرسۇلتان اتى اقىن-جازۋشىلاردىڭ تۋىندىلارى مەن شىعارمالارىندا اتالعان، ول تاريحتان وشپەيدى، بىراق بۇدان ءارى قاراي "جاڭا ءارى ءادىل قازاقستاندا" استانا قازاقستان تاعدىرىنا زور ىقپال ەتەدى. سول سەبەپتى [استانا اتاۋىن قايتارۋ تۋرالى] تاريحي شەشىمدى ءادىل دەپ سانايمىز، - دەدى داۋلەتكەرەي كاپۇلى.
جۋرناليست اينۇر شوشاەۆا استانا اتاۋىن وزگەرتۋگە بايلانىستى "حالىق اراسىندا ساۋالناما جۇرگىزىلدى مە" دەپ سۇرادى. جيىنعا قاتىسۋشىلار "رەسمي تۇردە جۇرگىزىلگەن جوق، الايدا تەلەگرام ارنالارداعى ءتۇرلى ساۋالناما ناتيجەسىن ەسكەردىك، وندا 80 پايىزى نۇر-سۇلتاندى استانا دەگەن اتاۋدى قولدادى" دەپ جاۋاپ بەردى. جۋرناليست "تەلەگرام ارنالار استانانىڭ ميلليون تۇرعىنىنىڭ پىكىرىن بىلدىرمەيدى" دەگەن كەزدە جيىنعا قاتىسۋشىلار رەاكتسيا بىلدىرمەدى.
جۋرناليست سونىمەن بىرگە "2019 جىلى 20 ناۋرىزدا استانانى نۇر-سۇلتان دەپ اتاۋ تۋرالى شەشىمدى قولداعاندار سول ءۇشىن حالىقتان كەشىرىم سۇراي ما؟" دەپ سۇرادى. جيىن مودەراتورى، ءماسليحات حاتشىسى ەرلان قاناليموۆ سۇراقتىڭ "ورىنسىز" ەكەنىن ايتىپ، "ول كەزدە التىنشى شاقىرىلىمداعى دەپۋتاتتار بولعان، ال قازىر جەتىنشى شاقىرىلىم دەپۋتاتتارى وتىر" دەپ جاۋاپ بەردى.
"استانا اتاۋىن قايتارساق، بۇل كەشىرىم سۇراۋمەن پارا-پار. قاجەت بولسا، كەشىرىم دە سۇرايمىز. بىراق شەشىم قابىلدانسا، وعان قاجەتتىلىك جوق" دەدى ەرلان قاناليموۆ.
ءماسليحات حاتشىسىنىڭ تۇسىندىرۋىنشە، قالالىق ونوماستيكا كوميسسيانىڭ ۇسىنىسى قوعامدىق تىڭداۋعا شىعارىلىپ، ودان كەيىن ءماسليحات سەسسياسىندا قارالادى. بۇدان سوڭ رەسپۋبليكالىق ونوماستيكا كوميسسياسىنا جىبەرىلەدى. ول جاقتا قۇپتالسا، ۇكىمەتكە جونەلتىلىپ، ارتىنشا پرەزيدەنتكە قول قويۋعا جىبەرىلەدى.
ءماسليحات حاتشىسىنىڭ مالىمەتىنشە، 2019 جىلى استاناعا نۇر-سۇلتان اتاۋىن بەرگەن كەزدە ەلتاڭبا، باننەرلەر مەن بلانكتەردى اۋىستىرۋعا 30 ميلليون تەڭگە جۇمسالعان. ونىڭ سوزىنشە، قۇجاتتار تسيفرلانىپ جاتقاندىقتان بۇل جولى شىعىن از كەتۋى ىقتيمال.
"ادىرنا" ۇلتتىق پورتالى
