Astana qalasynyń máslıhat depýtattary 15 qyrkúıek kúngi qoǵamdyq tyńdaýda Astana ataýyn qaıtarý týraly bastamany biraýyzdan maquldady, dep habarlaıdy "Adyrna" ulttyq portaly Azattyqqa silteme jasap.
Jıynda sóılegen azamattar Astana ataýyn qaıtarý qajettigin atap ótti.
Astananyń onomastıka komıssııasynyń múshesi Búrkitbaı Aıaǵan astanaǵa Nur-Sultan ataýyn berý týraly 2019 jylǵy sheshimdi eske alyp, birinshi prezıdent Nursultan Nazarbaevtyń eńbegin moıyndaý qajet bolǵanmen sol kezdegi sheshimniń ózi asyǵys qabyldanǵanyn atap ótti.
"Memleket tarıhynda mundaı oqıǵalar bolyp turady. Qalaǵa Astana ataýyn qaıtarý týraly usynysymyz talaptarǵa sáıkes keledi. Eń bastysy ol jikke bólingen qoǵamdy biriktiredi. Nursultan Ábishulynyń ózi túsinip, renjimes dep oılaımyn" dedi Búrkitbaı Aıaǵan.
Onomastıka komıssııasynyń taǵy bir múshesi, Qazaqstan jýrnalıster odaǵynyń hatshysy Dáýletkereı Kápuly "memlekettiń taǵdyry bir tulǵanyń taǵdyrynan qymbat" dedi.
- Nursultan aty aqyn-jazýshylardyń týyndylary men shyǵarmalarynda atalǵan, ol tarıhtan óshpeıdi, biraq budan ári qaraı "jańa ári ádil Qazaqstanda" Astana Qazaqstan taǵdyryna zor yqpal etedi. Sol sebepti [Astana ataýyn qaıtarý týraly] tarıhı sheshimdi ádil dep sanaımyz, - dedi Dáýletkereı Kápuly.
Jýrnalıst Aınur Shoshaeva astana ataýyn ózgertýge baılanysty "halyq arasynda saýalnama júrgizildi me" dep surady. Jıynǵa qatysýshylar "resmı túrde júrgizilgen joq, alaıda Telegram arnalardaǵy túrli saýalnama nátıjesin eskerdik, onda 80 paıyzy Nur-Sultandy Astana degen ataýdy qoldady" dep jaýap berdi. Jýrnalıst "telegram arnalar astananyń mıllıon turǵynynyń pikirin bildirmeıdi" degen kezde jıynǵa qatysýshylar reakııa bildirmedi.
Jýrnalıst sonymen birge "2019 jyly 20 naýryzda Astanany Nur-Sultan dep ataý týraly sheshimdi qoldaǵandar sol úshin halyqtan keshirim suraı ma?" dep surady. Jıyn moderatory, máslıhat hatshysy Erlan Qanalımov suraqtyń "orynsyz" ekenin aıtyp, "ol kezde altynshy shaqyrylymdaǵy depýtattar bolǵan, al qazir jetinshi shaqyrylym depýtattary otyr" dep jaýap berdi.
"Astana ataýyn qaıtarsaq, bul keshirim suraýmen para-par. Qajet bolsa, keshirim de suraımyz. Biraq sheshim qabyldansa, oǵan qajettilik joq" dedi Erlan Qanalımov.
Máslıhat hatshysynyń túsindirýinshe, qalalyq onomastıka komıssııanyń usynysy qoǵamdyq tyńdaýǵa shyǵarylyp, odan keıin máslıhat sessııasynda qaralady. Budan soń respýblıkalyq onomastıka komıssııasyna jiberiledi. Ol jaqta quptalsa, úkimetke jóneltilip, artynsha prezıdentke qol qoıýǵa jiberiledi.
Máslıhat hatshysynyń málimetinshe, 2019 jyly astanaǵa Nur-Sultan ataýyn bergen kezde eltańba, bannerler men blankterdi aýystyrýǵa 30 mıllıon teńge jumsalǵan. Onyń sózinshe, qujattar ıfrlanyp jatqandyqtan bul joly shyǵyn az ketýi yqtımal.
"Adyrna" ulttyq portaly
